हेटौडामा जनजाति युवालाई केश काट्ने तालिम
अशोक सुजन श्रेष्ठ
हेटौडा-आदिवासी जनजाति युवाका लागि आयोजित एक महिने कपाल काट्ने तालिम आज(बुधबार) हेटौडामा समापन गरिएको छ । जिल्ला बिकास समिति मकवानपुरको आर्थिक सहयोगमा नेपाल मगर संघ मकवानपुरले कार्यक्रम आयोजना गरेको हो ।
२० जना आदिवासी जनजाति युवक/युवती सहभागी तालिममा जितेन्द्र ठाकुर ‘राजा’ले प्रशिक्षण दिएका थिए । समापन कार्यक्रममा जिल्ला बिकास समिति मकवानपुरका स्थानीय बिकास अधिकारी भोजराज खतिवडाको प्रमुख आतिथ्य तथा आदिवासी जनजाति जिल्ला समन्वय समिति मकवानपुरका उपाध्यक्ष भवसागर श्रेष्ठको बिशेष आतिथ्य रहेको थियो ।
कार्यक्रम नेपाल मगर संघ मकवानपुरका अध्यक्ष दुधराज थापा मगरको अध्यक्षतामा भएको थियो । कार्यक्रममा नेपाल आदिवासी जनजाति महासंघ मकवानपुरका अध्यक्ष तिर्थबहादुर थापा मगर, हेटौडा अध्यक्ष जंगबहादुर गुरुङ, नेपाल मगर महिला संघकी निर्वतमान केन्द्रीय सदस्य रमा राना मगर, जिल्ला अध्यक्ष उर्मिला राना मगर, नेपाल मगर संघका जिल्ला सल्लाहकार शान्तध्वज राना मगर, जिल्ला कोषाध्यक्ष शंकर थापा मगर तथा तालिममा सहभागीहरु राजकुमार स्याङ्तान, कला आले मगर लगाएतले मन्तव्य व्यक्त गरेका थिए ।
कार्यक्रममै संघका केन्द्रिय सदस्य एवम् नारायणी अञ्चल संयोजक बिश्व आले मगर, जिल्ला सल्लाहकार रामेश्वर राना, नेपाल आदिवासी जनजाति महासंघ मकवानपुरका सचिव कृष्णशरण जोशी, नेपाल मगर युवा संघका केन्द्रीय अध्यक्ष अशोक सारु मगर लगाएतको आतिथ्य रहेको थियो ।
कार्यक्रमका बक्ताहरुले लक्षित बर्गका लागि छुट्याईने बजेट समान रुपमा बितरण गर्दा आदिवासी जनजातीले कम बजेट पाउने गरेको भन्दै जनसंख्याको आधारमा बजेट बृद्धी गर्न माग गरेका छन् । आदिवासी जनजातिका लागि छुट्याईने बजेट पूर्वाधार तथा अन्य क्षेत्रमा बिनियोजन नगर्न समेत आग्रह गरेका थिए ।
