परदेशी भाइको दिदीलाई पत्र

प्यारी दिदी ,
सात समुन्द्र पारीबाट अरु केही गर्न नसके पनि तिमीलाई खुबै सम्झेको छु, दिदी, कतिपय कुराहरु आँखा चिम्म गरेपछि देखिने रैछन ! ड्युटी सकेपछि कोठामा आएर अन् गरेको मोबाइल संगै बजेको तिहारको मंगल धुनले किन किन मनलाई अमिलो बनाइदियो । त्यसपछि आँखा चिम्म गरेर बिगतका तिहारका परिदृश्य हरुलाई एक एक गरेर मानस्पटलको पर्दामा देखिए ।
दृश्यहरु सुखान्त भएपनि किन किन मन चाही भाबविह्वल बनिदियो ! ५ वर्ष भएछ दिदी तिमीसँग टिका लगाउन नपाएको, ५ वर्ष अघि वा मेरो पछिल्लो तिहारमा तिम्रा स्नेह , माया र आशिर्बादले भरिएको हातले थमाएको उपहार हेरेरै यो तिहार संगै ५ वटा तिहार बिताउने छु, दिदी त्यहाँ मखमली ढकमक्क फुलिरहेको होला तर म यहाँ ओइलाएको छु, त्यहाँ जताततै झिलिमिली बत्तिहरु बलिरहेका होलान तर यहाँ म निभेको छु ! तिमीले त्यहाँ सयपत्री माला उनिरहादा म यहाँ त्यस्सै चोइटियेको छु ! उता रंगिन बनिरहेको दिपावलीमा म भने फिक्का छु ! दिदी, मेरा रहरहरु त तिमीले सत्रु क्षय हुन् भनि फोरेको ओखर संगै छिन्न भिन्न भएछन ! दिदी , चाड पर्ब जति नजिकिन्छ बिगतका परिदृश्य हरुले तेती नै बेचैन गराइदिञ्छ ! मिस गरिरहेको छु दिदि तिम्रा ति कोमल हातले स्पर्श गरेको खाली निधार अनि तिमीले पकाएका सेल रोटि ! दिदि , तिमीले यमराजले पनि लैजान नसकोस भनेर लगाएको तेल को घेरा लाइ बिबस्ताका छालहरुले तोडेर धेरै परसम्म पुराइदियो ! दिदी , हुनत समय सधै एकै नास कहाँ हुन्छर ? तैपनि
एउटा परदेशीको निम्ति चाडपर्ब सबैभन्दा पिडादाइ हुदोरैछ । भौतिक रुपले एकै ठाउमा नभएपनि तिमी मेरो मनमा छौ ! मुटुमा छौ । यी शब्दमा लेखि रहनै पर्दैन । दिदी म नहुँदा चित्त नदुखाउनु, यो बेला संगै नभएर के भो र , तिम्रै आशिर्बाद को उर्जाले त मेरो जिन्दगीको रफ्तार चलिरहेको छ , तिमीले पहिराइदियेको कहिलै नओइलाउने मखमली फुलको मालाको शक्तिले त अहिलेसम्म रहर र आकांक्षा हरु जीवित छन् ! तिमिले नै दैलोमा ओखर संगै छिन्न भिन्न पारिदिएका शत्रु हरुसंग कुनै डर छैन ! दिदी , त्यसैले तिमी संगै नभएपनि तिम्रा आशिर्बाद हर पल संगै छन् ! यो तिहारमा संगै हुन नपाएकोमा मन दुखाउनु भन्दा बरु अबका प्रत्येक तिहारहरु संगै मनाउन पाइयोस भन्ने कामनाको मजबुत डोरीमा कहिल्यै नओइलाउने मखमली फूलहरु उनेर भाइको नाम मा राखिदिनु , यो तिहारमा पनि संगै टिका लगाउने दिदीको आकांक्षालाई पुरा गर्न नसकेकोमा क्षमा माग्दै बिदा हुन्छु !
उही दुखि भाइ
(स्याङ्जा , हाल कोरिया )