दक्षिण कोरियामा एनआरएनएको अधिवेशन शुरु : कानुन मन्त्रीको सम्बोधन
गैह्र आवासीय नेपाली संघ राष्ट्रिय समन्वय परिषद एनआरएनए दक्षिण कोरियाको छैठौं अधिबेसन सउलमा शनिबारदेखि सुरु भएको छ ।
अधिबेशनका प्रमुख अतिथी कानुनमन्त्री यज्ञ बहादुर थापाले अधिवेशन सफल रुपमा सम्पन्न गर्न शुभकामना व्यक्त गरे । मन्त्री थापाले अधिवेशनले सक्षम तथा नयाँ नेतृत्व चुन्नेमा विश्वास गर्दै उनले कोरियामा आएका युवाले आत्महत्या गरे भन्दा आफूलाई निक्कै दुःख लागेको र यसको निराकरणको लागि आफूले सक्दो पहल गर्ने प्रतिबद्धता व्यक्त गरे ।
सामाजिक अभियन्ता तथा राष्ट्रिय आविष्कार केन्द्र संस्थापक डा. महावीर पुनले विदेशमा बस्ने नेपालीको लगानीमा नेपालको विकास हुन सक्ने आशा ब्यक्त गरे । उनले राष्ट्रिय आविस्कार केन्द्र यसैको एउटा उदाहरणको रुपमा विकास गरेको बताए । कार्यक्रममा दक्षिण कोरियाका लागि नेपाली राजदुत अर्जुन जंगबहादुर सिंहले पनि सफलताको शुभकामना दिए ।
अधिवेशन दोस्रो दिन आइतबार एनआरएनए दक्षिण कोरियाको नयाँ नेतृत्वका लागि निर्वाचन हुनेछ । निर्वाचन समितिका अनुसार अध्यक्षका लागि जुनु गुरुङ, लक्ष्मी गुरुङ र ओम नारायण जुग्जाली मगरले उम्मेद्धवारी दिएका छन् । यस अघि नै अध्यक्षका दावेदारका रुपमा रहेका रविन तामाङ र बुद्धि गुरुङले उम्मेद्धवारी फिर्ता लिएका छन् । आईसीसी सदस्यमा खेम कार्की ,लोचन राई ,राजु क्षेत्री र प्रकाश धमला, बरिष्ठ उपाध्यक्षमा बिपिन गुरुङ र दिपक पुन, उपाध्यक्षमा अमृत राई, बसन्त राज घिमिरे, जिबन कुमार थापा, लालकाजी बस्नेत, रबिन राई, साजन शर्मा र सुरेश खत्री, महासचिबमा राजु सन्तोषी थापा र डा. इन्दिरा तिवारी, सचिबमा भरत प्रसाद सुबेदी, नबिन पुडासैनी, नेत्र नारायण पौडेल र राजेश घिमिरे रहेका छन् । त्यस्तै कोषाध्यक्षमा दिनामणि पौडेल, गोपाल बोहोरा, लोक बहादुर बानियाँ र युबराज दाहाल सहकोषाध्यक्षमा जित बहादुर थापासारु मगर र कृष्ण प्रशाद अर्याल, महिला प्रतिनिधि भावना गुरुङ, युवा प्रतिनिधि सन्तोष राई, आकाश वली र सदस्यमा १२ जनाले उमेद्धवारी दिएका छन् ।
आइतबार बिहान १० बजे देखि दिउसो ३ बजे सम्म मतदान समय तोकिएको छ । मतदानका लागि आफ्नो परिचय खुल्ने कुनै कागजात लिएर आउनु पर्ने र त्यसैका आधारमा एनआरएनए केन्द्रले तयार गरेको सदस्यता कार्ड दिइनेछ । कार्यक्रम हुने स्थान जोंग्नो कुमिन ह्वेग्वान, हिस्ट्री एंड कल्चरल पार्क स्टेशनबाट नजिकै रहेको छ । तोङदेमुनबाट पैदल जान सकिनेछ ।
