कोरियामा तीज मैजारो
नेपाली हिन्दू महिलाहरुको महान चाड हरितालिका तीज पर्व यसपाली पनि कोरियामा रहेका नेपाली दिदीबहिनीहरुले धुमधामका साथ मनाएका छन् । तीजको अवसर पारेर वुमन फर वुमन दक्षिण कोरियाले नेपालबाट आएकी लोकदोहोरी गायिका भीमु गुरुङको साथ साँस्कृतिक कार्यक्रमको आयोजना गरी तीज पर्व मनायो ।
यता छनान आसान नेपाली समाजले पनि नेपाली दिदीबहिनीहरुसहित करिब ७० जनाको उपस्थितिमा तीज विशेष दर खाने कार्यक्रमको आयोजना गरेको थियो । गत २७ तारिख आइतबार ओन्याङ ओन्छनमा आयोजित उक्त कार्यक्रम वुमन फर वुमनका अध्यक्ष पद्या श्रेष्ठ प्रमुख अतिथिका रुपमा रहेका थिए । कार्यक्रममा ओन्याङस्थित माइग्रेन सेन्टरका साजाङनिम लगायत समाजका सल्लाहाकार एवं समाजका सचिव गीता राई, उमा गुरुङ, प्रवेश राई, धनकुटा सेवा समाजका सचिव राजन शाक्यलगायतले तीजको शुभकामना मन्तब्य ब्यक्त गरेका थिए ।
प्रमुख अतिथि पद्या श्रेष्ठले नारीहरुको महान पर्व हरितालिका तिजको शुभकामना साथै अब नारीहरुले पनि हरेक क्षेत्रमा अगाडि बढ्नुपर्ने बताएका थिए ।
समाजका सचिब तिलक बुढामगरले संचालन गरेको कार्यक्रममा उपाध्यक्ष रत्न लिम्बूले स्वागत मन्तव्य राखेका थिए । त्यस्तै कार्यक्रमका सभापति एवं समाजका अध्यक्ष सञ्जिब घलेले समाज स्थापना गर्नुको साथै समाजले गरिरहेको गतिविधिहरुबारे प्रकाश पारेका थिए भने समाजका सहसचिव सम्झना सिञ्जालीले पनि शुभकामना मन्तव्य राखेकी थिइन् ।
उक्त कार्यक्रमलाई आर्थिक, भौतिक, नैतिक रुपमा सहयोग गर्नुहुने सबै संघसंस्था एवं व्यक्तिहरुको उच्च मुल्यांकन गर्दै छनान आसान नेपाली एकता समाजले कार्यक्रममा उपस्थिति जनाइ कार्यक्रम सफल बनाइदिनुहुने सम्पूर्णलाई धन्यवाद ज्ञापन गरेका थिए ।
उता आइतबारकै दिन देजनस्थित सगरमाथा नेपाली रेष्टुँराले पनि विशेष तीज कार्यक्रमको आयोजना गरेको थियो । देजनलगायत विभिन्न स्थानबाट आएका नेपाली दिदीबहिनीहरुको उपस्थितिमा विभिन्न परिकारको स्वादसँगै तीज गीतमा दिदीबहिनीहरुले दिल खोलेर नाचगान गरी यो वर्षको तीजलाई मैजारो गरेका थिए ।
त्यसैगरी नेपाल प्रवासी महिला समूह बुसानले पनि गत अगष्ट २० तारिखका दिन विशेष तीज कार्यक्रमको आयोजना गरेको थियो । विभिन्न स्थानीय कलाकारहरुको साथमा सांगीतिक प्रंस्तुतिसँगै तीजको दर खाएर नेपाली महिलाहरुको चाड तीजलाई भब्य रुपमा मनाएको थियो ।
त्यस्तै कोरियाको सुवन सहरमा गुल्मी सम्पर्क समिति दक्षिण कोरियाले हरेक वर्ष झैं यसपाली पनि भब्य रुपमा तीज विशेष दर खाने कार्यक्रमको आयोजना गरेको थियो । कार्यक्रममा लोक तथा दोहोरी गायिका कोपिला गुरुङले विशेष प्रस्तुतिका साथ उपस्थित सबैलाई भरपूर मनोरञ्जन प्रदान गरेकी थिइन् । कार्यक्रममा स्थानीय कलाकार चरित्र विष्ट, टिका पौडेललगायतले आफ्नो प्रस्तृति पस्केका थिए । उक्त कार्यक्रममा भलिबल खेलाडीहरुका साथै गायिका तथा मोडेल कोपिला गुरुङ , मोडेल आलिशा सिंह ,गायक टिका पौडेल ,गायक चरित्र बिष्ट ,तथा समितिलाई लामो समय देखि बिभिन्न क्रियाकलापमा सहयोग गरेबापत समाजसेवी कौसला क्षेत्रि ,रोशन पौडेललाइ समेत सम्मान गरिएको थियो ।
