२३ औं विश्व आदिवासी दिवसको सन्दर्भमा पत्रकार सम्मेलन
काठमाडौं, २३ औं विश्व आदिवासी दिवस (९ अगष्ट २०१७) को सन्दर्भमा आदिवासी किरात महासंघ, सूचीउन्मुख आदिवासी जनजाति संघर्ष समिति, आदिवासी जनजाति सूचिकरण संयुक्त संघर्ष समितिको संयुक्त आयोजनामा २४ साउनका दिन मधेश मिडिया हाउस, काठमाडौंमा एक पत्रकार सम्मेलनको आयोजना गरिएको थियो ।
उक्त कार्यक्रममा संघीय मामिला तथा स्थानीय विकास मंत्रीहरूबाट पटक पटक सूचीकरणको समस्यालाई समाधान गर्ने प्रक्रिया अघि बढाएको भए तापनि आदिवासी जनजाति उत्थान राष्ट्रिय प्रतिष्ठान र नेपाल आदिवासी जनजाति महासंघले नै ४३ भन्दा बढी सूचीउन्मुख आदिवासी जनजाति समुदायहरूलाई सूचीकृत गर्न वाधा अडचन गराइ अन्य जातिको पहिचानभित्र रहन वाध्य गराइरहेको जानकारी गराइएको थियो ।
प्रतिष्ठानको विद्यमान संचालक परिषदको गठन हुने प्रकृया र संरचना तथा जनजाति महासंघको विद्यमान प्रवृत्ती र विधानमा सदस्यता तथा संरचना समावेशी नबनाए २३ लाखभन्दा बढी जनताहरू असमानता, विभेद, अन्यायमा परिरहने हुनाले सरोकारवालाहरूले यथाशिघ्र समस्याको समाधान गर्न माग गरेका थिए । साथै अन्याय, विभेदलाई प्रश्रय दिइरहने संघसंसथाहरूको आवश्यकता नरहेको समेत जनाएका थिए ।
प्रेस विज्ञप्तिको वाचन आदिवासी जनजाति सूचीकरण संयुक्त संघर्ष समितिका संयोजक राजन डोनेले गरेका थिए । पत्रकारहरूको थप जिज्ञासालाई सम्बोधन गर्ने क्रममा सूचिउन्मुख आदिवासी जनजाति संघर्ष समितिका महासचिव कुमार विक्रम खवास र आदिवासी किरात महासंघका अध्यक्ष पृथ्वीराज मुकारूङ बान्तवाले विद्यमान आदिवासी जनजातिको ५९ जाति वा समुदायको सूची अवैज्ञानिक र असमावेशी रहेकोले ठोस मापदण्डका आधारमा आदिवासी जनजाति आयोगले पूर्णरूपमा पूर्नसूचीकरण गर्नुपर्ने माग गरेका थिए ।
कार्यक्रमको संचालन तथा समापन सूचीकरणको सवाललाई प्रारम्भकालदेखीनै जनपैरवी गर्दै आएका चन्द्रसिंह कुलुङले गरेका थिए । उक्त कार्यक्रममा वाचन गरिएको प्रेस विज्ञप्तिको पूर्ण पाठ संलग्न छ ।
