राजदूत लामा आर्थिक सहयोग धेरै जुटाउने सूचीमा
फोनिज कोरिया संवाददाता
सोल-कोरियाका लागि नेपाली राजदूत कमानसिंह लामा भूकम्प पीडितका लागि आर्थिक सहयोग धेरै जुटाउने कूटनीतिक नियोग प्रमुखहरुको सूचीमा परेका छन् | परराष्ट्र मन्त्रालयले जनाए अनुसार धेरै सहयोग जुटाउने सूचीमा राजदूत लामा तेश्रो नम्बरमा परेका हुन् |
गत बैशाख १२ गतेको आएको बिनाशकारी भूकम्पले ल्याएको विनाश सामना गर्न विदेशस्थित कूटनीतिक नियोगसमेत परिचालन गर्ने सरकारको निर्णयअनुसार परराष्ट्रले सबै नियोगहरुलाई आर्थिक सहयोग संकलन गर्न निर्देशन दिएको थियो | सो निर्देशन अनुसार कोरियाबाट हालसम्म ९ करोड रुपैयाँ प्रधानमन्त्री राहत कोषमा जम्मा भएको मन्त्रालयले जनाएको छ |
सबैभन्दा धेरै सहयोग संकलन गर्नेमा जापानका लागि नेपाली राजदूत मदनकुमार भट्टराई परेका छन् | उनले हालसम्म १६ करोड रुपैयाँ राहत कोषमा जम्मागरेका छन् त्यस्तै दोश्रोमा बैंकक दूताबासबाट ११ करोड जम्मा भएको जनाइएको छ |
भूकम्प पीडितको सहयोगका लागि हालसम्म २१ वटा दूतावास र तीन महावाणिज्यदूतावासले सहयोग रकम संकलन गरेका छन् |करिब ५५ करोड रुपैयाँ संकलन गरेका छन् | राजदूत लामाले १५ करोड पुर्याउने लक्ष रहेको बताएका छन् |यसका लागि उपनियोग प्रमुख राजाराम बर्तौलाको संयोजकत्वमा ‘राहत उद्धार कोष ‘ स्थापना गरिएको छ |
अमेरिका, जर्मनी, क्यानडा जस्ता शक्तिशाली राष्ट्रमा रहेका राजदूतावासले अहिलेसम्म आर्थिक सहयोग संकलन गर्न नसकेको पनि परराष्ट्र मन्त्रालयले जनाएको छ ।
