जनजाति महासंघको महाधिवेशन मंसिरमा

काठमाडौं, नेपाल आदिवासी जनजाति महासंघको नवौं महाधिवेशन आगामी मंसिर दोस्रो साता हुने भएको छ । महासंघ संघीय परिषदको बैठकले आउँदो मंसिर ११ देखि १३ मा महाधिवेशन गर्ने निर्णय गरेको हो । महासंघको विधानअनुसार महाधिवेशन गत चैतमा सम्पन्न भइसक्नुपथ्र्यो । ‘आन्तरिक कारणले महाधिवेशन केही ढिलो भएको छ,’ महासंघका अध्यक्ष नगेन्द्र कुमालले  भने, ‘मिति तय भएको छ । केही दिनभित्र महाधिवेशनस्थल टुंगो लाग्छ ।

महासंघमा ५६ जातीय संस्था संलग्न छन् । हरेक तीन वर्षमा महाधिवेशनबाट जातीय संगठन प्रतिनिधिमध्येबाट अध्यक्ष, उपाध्यक्ष, महासचिव, सचिव, कोषाध्यक्षलगायत कार्यसमिति चयन गर्ने गरिएको छ । यसअघि २०७० चैतमा चितवनको सौराहमा आठौं महाधिवेशन भएको थियो ।

महासंघले सरकारसित संघीय प्रदेश, स्थानीय तह, विशेष संरक्षित र स्वायत्त क्षेत्रको नामांकन आदिवासी जनजातिहरूको ऐतिहासिक, भाषिक, सांस्कृतिक पहिचानको आधारमा हुनुपर्ने माग राख्दै आएको छ । संविधानको धारा ८८ र १५६ अनुरूप समानुपातिक उम्मेदवारको बन्दसूचीमा निर्वाचित प्रतिनिधि छान्दा पहिलो हुने निर्वाचित हुने पद्धतिबाट जनसंख्याको अनुपातमा प्रतिनिधित्व भइसकेको जातजातिबाट नभई त्यसमा निर्वाचित नभएकाहरूलाई न्यूनतम एक जाति एक प्रतिनिधित्व सुनिश्चित गर्न पहिलो प्राथमिकता र निर्वाचित भए पनि जनसंख्याको अनुपातमा कम निर्वाचित भएको समुदायलाई दोस्रो प्राथमिकतामा राख्ने थप व्यवस्था गर्न भनेको छ ।

साथै, आदिवासी जनजातिलाई हरेक तहको निर्वाचित संस्थाको अतिरिक्त राज्यका सबै अंग र तहमा जातीय जनसंख्याको अनुपातमा समानुपातिक र समावेशी प्रतिनिधित्वको हक हुनुपर्ने माग राख्दै आएको छ । महाधिवेशनले यही विषयलाई जोडदार रूपमा उठाउने अध्यक्ष कुमालले बताए । -कान्तिपुर