अनेसास कोरिया च्याप्टरको पदमा कृसबाबु गुल्मेली
फोनिज कोरिया सम्वाददाता
सउल,
अन्तर्राष्ट्रिय नेपाली साहित्य समाज(अनेसास) कोरिया च्याप्टरको अध्यक्ष पदमा कृसबाबु गुल्मेलीलाई चयन गरिएको छ । यसअघि अनेसासको अध्यक्ष पदमा कमलप्रसाद अर्याल र स्व. मनोजकुमार डाँगी रहेका थिए । तर अचानक मनोजकुमार डाँगीको असमायिक निधनपछि रिक्त रहेको अध्यक्ष पदमा अनेसास कार्यसमितिले कृषबाबु गुल्मेलीलाई चयन गरेको हो । खाली रहेको अध्यक्ष पदका लागि अनेसासले गत २७ तारिखसम्म खुला उमेदवारीको लागि आब्हान गरेको थियो ।
लामोसमयदेखि दक्षिण कोरियामा रहदै आएका गुल्मेली साहित्य लेखनमा सक्रिय रहदै आएका छन् । गीतकार, कवि तथा मोडेल गुल्मेली नेपाल कोरिया ट्राभल्स एण्ड टुरमा कार्यरत छन् ।
अनेसास कोरिया च्याप्टर भाषा- साहित्य, कला र संस्कृतीको उत्थान र विकास गर्ने अभिप्रायले नेपाली डायस्पोरामा रहेर सेवा गर्न इच्छुक सबै व्यक्तित्वहरु सम्मिलित अन्तर्राष्ट्रिय साहित्यिक संस्था हो | सन २०१४ फेब्रुअरिमा अनेसास कोरियाको स्थापना भएको हो ।
अन्तर्राष्ट्रिय नेपाली साहित्य समाज (अनेसास)को स्थापना सन् १९९१ मा संयुक्त राज्य अमेरिकाको कोलोम्बिया डिस्ट्रिकमा भएको थियो | यसै क्रममा अन्तर्राष्ट्रिय नेपाली साहित्य समाजको एउटा च्याप्टरको रूपमा सन् २००४ मा अन्तर्राष्ट्रिय नेपाली साहित्य समाज न्यूयोर्क च्याप्टरको स्थापना भएको हो |हालसम्म संसारका ३० देशमा अन्तर्राष्ट्रिय नेपाली साहित्य समाजका ६५ वटाभन्दा बढी च्याप्टरहरु स्थापना भै क्रियाशील रहेका छन् |
