सकियो माम्फ

फोनिजकोरिया सम्वाददाता
छाङवन,
बुद्ध वाज बर्न इन नेपाल लेखिएको शब्दसँगै नेपालको प्राकृतिक सम्पदा झल्किने ब्यानरसहित नेपाली झण्डा फहराउदै लामबद्ध भएर आइतबार दुईसय भन्दा बढी नेपालीहरु परेडमा सहभागी भए । हरेक वर्ष दक्षिण कोरियाको ध्यङसाङनाम्दोको छाङवन शहरस्थित योङजी पार्कमा आयोजना हुदै आएको आप्रवासीहरुको बहुसाँस्कृतिक मेला (माम्फ)को अन्तिम दिन विभिन्न मुलुकका संस्कृति झल्कने झाँकीसहितको बहुसाँस्कृतिक(धामुन्ह्वा) परेडमा सहभागी नेपालीहरुले नेपाली कला संस्कृति र पहिचान झल्कने गरी नेपाली भेषभूषामा सजिएर सहभागीता जनाएका थिए ।
नेपाल, मंगोल, बंगलादेश, भियतनाम, श्रीलंका, उजबेकिस्तान, इन्डोनेसिया, चीन, कम्बोडिया, थाइल्याण्ड, पाकिस्तान र फिलिपिन गरी १२ मुलुकको सहभागिता रहेको माम्फ महोत्सवको धामुन्ह्वा परेडमा फिलिपिनले ३० लाख वन सहितको प्रथम पुरस्कार पाउन सफल भएको थियो ।
त्यसैगरी कम्बोडिया दोस्रो तथा इन्डोनेसिया तेस्रो भएको थियो । दोस्रो र तेस्रो भएको मुलुकलाई क्रमशः २० लाख वन र १० लाख वन प्रदान गरिएको थियो । नेपाल सहित अन्य सहभागी मुलुकलाई सान्त्वना सहित ५ लाख वन नगद प्रदान गरिएको थियो ।
तीन दिनसम्म चलेको महोत्सवमा विभिन्न मुलुकको परिचय र चिनारी दिने किसिमका पहिरन, भेषभूषा, कला, संस्कृति झल्कने बस्तुहरुको प्रदर्शनीका साथै आआफ्नो मुलुकको खानाको परिकारहरु राखिएको थियो । त्यस्तै तीनदिनसम्म विभिन्न खेलका साथै स्थानीय तथा विदेशी कलाकारहरुले गीतसंगीत पस्केका थिए ।
कार्यक्रममा सहभागी हरेक मुलुकबाट आएका ख्यातीप्राप्त गायकगायिकाहरुले आइतबार साँझ हलमा आआफ्नो प्रस्तुति पस्केका थिए । यहि कार्यक्रमकै लागि नेपालबाट आएका लोकदोहोरी गायक बद्रंी पंगेनीले पनि आफ्ना दुई लोक गीत प्रस्तुत गरेर उपस्थित दर्शकलाई मनोरञ्जन प्रदान गरेका थिए ।  नेपाली दुतावासबाट समेत सहभागिता रहेको कार्यक्रम स्थलमा सहभागी हुनको लागि टाढाबाट आउनेहरुलाई विभिन्न स्थानमा निशुल्क बसको व्यवस्था समेत गरिएको थियो ।