कोरियामा तीजको रमझम शुरु
सउल ,
शनिबार साँझ । सुवनको सांग्रीला रेष्टुरेण्टका संचालक लोक राई खुबै ब्यस्त थिए । किचनमा आलुको आचार, पकौडा, कुखरा र खसीको मासु, पुलाउ जस्ता परिकार पाक्दै थिए । उनले रेष्टुरेण्टमा अरु दिनको भन्दा बढि र नेपाली पाराका परिकार तयार पार्दै थिए । यो सबै चाजोपाँजो मिलाउनुको कारण थियो नेपाली चेलीहरुको तीजको अबसरमा दर खाने कार्यक्रम ।
साँझ छिप्पिदै गए पछि नेपाली महिलाहरुको भीड बाक्लिदै गयो । रातो सारी, लेहेंगा, चुरा पोते अनि सिन्दुरमा सजिएर उनीहरु तीज मनाउन तयार भएका थिए । वातावरण हेर्दा कोरियामा नभएर नैपालमा सामुहिक रुपमा दर खान महिलाहरु भेला भएका जस्ता देखिन्थे ।
विदेशी भूमिमा वर्षभरि गरेको दुख विर्सदै तीज मनाउन, नाच्न गाउन उनीहरु भेला भएका थिए । बुट्टेदार लेहेंगामा चिटिक्क परेकी रेश्मा राईले यो कार्यक्रमलाई संयोजन गरेकी हुन् । अरु बेला दुःख गरे पनि तीज नेपाली महिला दिदीबहिनीहरुको चाड भएकोले मनाउन लागेको बताइन् । ‘बर्षको एक पटक आउने चाडमा रमाइलो गर्नु पर्छ ।’ उनले थपिन् ।
केही नास्ता खाए पछि ठूलो स्वरमा तीजका गीत बज्न थाले । जम्मा भएका महिलाहरुले कम्मर मर्काइ मर्काइ नाच्न थाले । अरु दिन ब्यस्त भए पनि आज भिमा तुलाचन पनि नाच्नमा ब्यस्त थिइन । नाचेर थाकेपछि उनले सुनाइन ‘यो चाडले रमाइलो बनाउँछ । विदेशमा बस्ने हामी दिदी बहिनीलाई भेटघाट गराउँछ । मनका दुःखसुखका कुराकानी हुन्छ ।’ तुलाचनको भनाईलाई समर्थन गरिन सारा गुरुङले पनि । ‘यसरी नेपाली दिदीबहिनी भेट हुँदा नयाँ इनर्जी प्राप्त हुन्छ । छुट्टै आनन्द हुन्छ ।’
कोरियामा नेपाली महिलाहरुले एक हप्ता अघि नै तीज कार्यक्रम मनाए पनि नेपालमा भने सेप्टेम्बर ४ तारिखमा यो चाड मनाइदै छ । यस दिनमा नेपाली महिलाहरु पतिको सुस्वास्थ्य तथा दीर्घायूको कामना गर्दै निरहार ब्रत बस्दछन् । उनीहरु नजिकैको शिवालयमा गई पुजा गरि तीज मनाउँछन् ।
