माछापुच्छ्रे भलिबल रनिङ्ग कपको तयारी
सामाजिक सेवा साथै खेलकुदमा पनि सक्रिय रँहदै आएको कास्की परिवार,द.कोरियाले “खेलकुदमा युवाहरुको सक्रिय सहभागिता” भन्ने उद्देश्यका साथ माछापुच्छ्रे रनिङ्ग कप, भाग-२ यही आउँदो अगष्ट २८ आइतबारको दिन सम्पन्न गरिने भलिबल प्रतियोगिताको तयारी तिब्र रूपमा गरिरहेको छ ।
प्रवासी भूमिमा रहेको सम्पूर्ण सम्पूर्ण कास्केलीहरु सदस्य रहने गरि वरिष्ठ सल्लाहकार श्री नवीन गुरुङ्गको संयोजकत्वमा गठन गरिएको मुल आयोजक कमिटीले यसको तयारी तिव्र गतिमा भैरहेको जानकारी दिएका हुन् ।
यो कार्यक्रमलाई सभ्य र भब्य रूपमा सफल पार्नको लागि गत आइतबार म्याग्दी परिवारले आयोजना गरेको भलिबल प्रतियोगिता स्थलमा बसेको सामान्य बैठकले विभिन्न उपसमितिहरु गठन गरिएको सचिव बिशाल गुरुङ्गले बताए । जस अनुसार प्रचारप्रसार उपसमितिमा श्री सुरज गुरुङ्गको संयोजकत्वमा कृष्ण पुरी, विशाल गुरुङ्ग र अमृत वास्तोलालाई चयन गरिएको छ । भलिबल खेल संचालन उपसमितिमा गणेश घमालको संयोजकत्वमा शंकर गुरुङ्ग, बिक्की गुरुङ्ग र अमर सुनामलाई जिम्मा दिइएको छ । त्यसै गरि नेपाली खानाको परिकार ब्यबस्थापन उपसमितिमा पुर्ण चन्द्र अधिकारीलाई संयोजक तोकिएको छ भने रेष्टुरेन्ट बिक्रीवितरण उपसमितिको संयोजकमा सगुन भट्टचनलाई चयन गरिएको छ त्यस्तै स्वयंसेवक उपसमितिको संयोजकमा दल गुरुङ्गलाइ जिम्मेवारी सुम्पिएको छ । यसै गरि उक्त कार्यक्रमलाई भव्य रुपमा सफल पार्न सम्पूर्ण कस्केलीहरुलाई सकृय रहन परिवारले अनुरोध गरेको छ ।
समयको ब्यस्तता, गर्मीको मौसम र दर्शकहरुको सुबिधालाई मध्य नजर राख्दै नेपालीहरुको केन्द्रबिन्दु दोङ्गदेमुनको नजिकै पायक पर्ने, समयमै कार्यक्रम सम्पन्न गर्नको लागि डबल कोर्ट भएको सुबिधासम्पन्न कभर्डहल भएको दोङ्गदेमुन गु छेयुग ग्वान, दाब्सिम्निमा कार्यक्रम गरिने कास्की परिवारका अध्यक्ष श्री खोम गुरुङ्गले बताए । सोही कार्यक्रममा खेलकुदको बिकासको लागि सहयोगको निमित्त भाग्यशाली बम्पर चिठ्ठा पनि राखिएको हुँदा सबैले सहयोग गरिदिन पनि अध्यक्ष गुरुङ्गले अनुरोध गरेका छन । युवाहरुलाइ खेलकुदमा विशेष सहभागिताको मुल उद्देश्यले आयोजना गरिएको माछापुच्छ्रे भलिबल रनिङ्ग कप भाग-२ लाई पूर्ण रूपमा सफल पारिदिनुहुन कोरियामा कृयशील विभिन्न संघसंस्था, ब्यवसायी, समाजसेवी, बुद्धिजीवी, पत्रकार, खेलाडी, बिद्यार्थी लगायत सम्पूर्ण नेपाली समुदायमा कास्की परिवार विनम्रताको साथ अनुरोध गरेको छ ।
उक्त दिन कोरियामा रहनुभएका महिला खेलाडीहरुलाई पनि उचित अवसर,प्रोत्साहन र मनोरञ्जनको लागि महिला भलिबल प्रतियोगिता र ३५ वर्ष माथिका पुरुष भेट्रान्स फ्रेन्डसीप म्याच रमाइलोको निम्ति खेलाइने हुँदा इच्छुक संघ-संस्थाहरुले सहभागी जनाइदिनुहुन पनि कास्की परिवार हार्दिक अपिल गरेको छ ।
