एनआरएन कोरियामा बिबादै देखिएको हो भन्न मिल्दैन – अध्यक्ष बिनोद कुवर

गत सेप्टेम्बर ६ तारिख गर्ने भनिएको एनआरएन कोरियाको पाचौ अधिवेशन एक हप्ता पछि सार्दै १२ / १३ तारिख गर्ने तय गरिएको थियो तर गत बिहिबार निर्वाचन मण्डलले राजिनामा दिए पछि अनिश्चिता बढेको थियो | शनिबार नेपाल हाउसमा बसेको बैठकले आउदो २० तारिख अधिवेशन गर्ने निर्णय गर्दै निर्वाचन प्रक्रिया भने चुसकको अन्तिम दिन २९ तारिख गर्ने जनाएको छ | एनआरएन कोरियाले बारम्बार मिति किन सारिरहेको छ र तिब्र बिबाद देखिनुको कारण के होला यसै सेरोफेरोमा रहेर फोनिजकोरियाका लागि एनआरएन कोरिया अध्यक्ष बिनोद कुवरसंग निश्चल काउचाले गरेको कुराकानी :-

अरु देशमा जस्तै एनआरएन कोरियामा पनि तिब्र बिबाद देखियो नी ?

बिबाद नै त भन्न मिल्दैन | केही टेक्निकल समस्याहरुले गर्दा अधिवेशनको मिति सरेको हो |

एनआरएन कोरियाको अधिवेशन सरि रहनुको कारण के हो ?

हामीले शुरुमा सेप्टेम्बर ६ तारिख गर्ने भनेका थियौ त्यहि समयमा जापानमा पनि संगै परेको हुदा एक हप्ता पछि सारेका थियौ | १२ / १३ तारिखमा गर्ने भनियता पनि बिबिध कारणले गर्दा फेरी मिति सार्न बाध्य भयौ र आगामी २० तारिख अधिबेशन हुने तय गरिएको छ | सोहि दिन उमेदवारहरुको नोमिनेशन पनि हुने छ | निर्वाचन प्रक्रिया भने चुसकको अन्तिम दिन २९ तारिख हुने छ | केही साथीहरुले बिनोद कुवरले आफ्नो स्वार्थको लागि मिति सर्ने गरेको आरोप लगाउने गरेका छन् | यो सरासर गलत आरोप हो | म जति सक्दो छिटो अधिवेशन सम्पन्न होस् भन्ने चाहन्छु |

तपाईहरुले निर्बाचन मण्डललाई समयमा नै पंजीकृत सदस्यहरुको नामावली , आर्थिक लगायतका प्रतिवेदन उपलब्ध गराउन नसक्नुको कारण ?

केही उमेदवार साथीहरुले एकै जनाले ४ / ५ सय जनाको फारम भर्नु भएको रहेछ | त्यस मध्य पनि केहीको कोरिया आएको दुई बर्ष पनि नपुगेकाहरुको पनि फारम भरि दिएका कारण भेरीफाई गर्नु पर्ने भएकोले ढिला भएको हो | त्यसरी धेरै जनाको फारम भर्ने साथीहरुले हामीलाई फारम मात्र भरेर बुजाए साथमा आर्थिक पनि संगै आउनु पर्ने थियो | यी बिबिध कारणले गर्दा केही ढिला भएको पक्कै हो |

एनआरएन कोरियामा राजनीति बढी भो भनिन्छ नी ?

मलाई राजनीति नै भए जस्तो त लाग्दैन तर पनि यो समस्या कोरियामा मात्र भएको होईन | अरु देशको एनआरएनमा पनि यो समस्या देखिएको छ |

गत सलनालमा एनआरएन कोरियाको संयोजकत्वमा गरिएको महामेलाको आर्थिक प्रतिवेदन अहिलेसम्म सार्वजनिक किन नगरिएको हो ?

गत हप्ता नयाँ नेपाल हाउस उदघाटन समारोहमा पनि हामीले आर्थिक प्रतिबेदन सार्वजनिक गरेका थियौ | गत सलनालमा गरेको कार्यक्रम हाम्रो संजोजकत्वमा गरिएको भए अन्य संघ संस्थाहरु पनि सामेल थिए तसर्थ अझैसम्म पनि केही संघ , संस्था र व्यक्तिहरुले टिकटको अर्धकट्टी नबुझाई दिएको कारण समयमा सार्वजनिक गर्न नसकिएकै हो |

एनआरएन कोरियाको आउदो कार्य समितिमा हुण्डी कारोबारीलाई स्थान दिइनु हुदैन भन्ने जनआवाज सुनिदै छ | के यो सम्भव छ ?

पक्कै पनि अबैध हुण्डी कारोबार गरिनु हुदैन भन्ने मेरो मान्यता हो | हुण्डी कारोबार एनआरएन कोरियाको एकल प्रयासले रोक्न सक्ने कुरा पनि होईन | नेपाल सरकारले बैकिङ्ग प्रणालीवाट मात्र पैसा पठाउन मिल्ने गरि पोलिसी ल्याई दिए हुण्डी कारोबार आफै रोकिन्छ |