नेप्सेले कायम गर्यो ऐतिहासिक रेकर्ड
काठमाडौ – नेपालको शेयर बजारमा नेप्से परिसुचकले सात बर्षपछि छलाङ मार्दै सर्वाधिक बिन्दु टेकेको छ । २०६५ साल भदौ १५ गते नेप्सेले पार गरेको ११७५ को बिन्दुलाई माथ गर्दै बुधबार ११९१.९२ को बिन्दुमा उक्लिएको हो । मंगलबारको तुलनामा ३१.९९ अंकले नेप्सेमा बढोत्तरी भएपछि नेप्सेले नयाँ रेकर्ड कायम गरेको हो । २०६५ सालमा संबिधानसभाको चुनाव भई नयाँ सरकार बनेको सन्दर्भले नेप्सेमा उछाल ल्याएको थियो ।
यसपटक नयाँ संबिधान निर्माणको अन्तिम कसरत, बैंक तथा बित्तीय संस्थाहरुको अनिबार्य पूँजी बृद्धिको प्राबधान, सीडीएसको पूर्ण कार्यान्वयन र अभौतिक शेयरको कारोबारले नेप्सेलाई दरिलो टेवा दिएको देखिएको छ ।
बुधबार नेप्सेले नयाँ छलाङ मार्दा नेप्से ३२ अंकले बढेर बन्द भएको छ भने ६६ करोड ७७ लाख रुपैयाँको शेयर किनबेच भएको छ । अभौतिक ( डिम्याट) शेयरको अनबिार्य कारोबारले बजारमा बिक्रेताहरुको अभाव हुँदा सक्षम र ठूला बाणिज्य बैंकहरुको शेयर मूल्यमा उच्च चढाव देखिए पनि बाणिज्य बैंक समूह ३३ अंकले मात्र माथि चढेको छ भने होटल र बिमा समूह सूचकहरुमा उल्लेखनीय बृद्धि देखिएको छ ।
नेप्सेले उच्च छलाङ मारे पनि केही चुनिएका बाणिज्य बैंक बाहेक अन्य बाणिज्य बैंकहरुको शेयर मूल्यमा खासै ठूलो बृद्धि नदेखिनु अर्थपूर्ण छ । एभरेष्ट, स्टान्डर्ड चार्टर्ड, सानिमा लगायतका बैंकका शेयरहरु खरिद गर्न लगानीकर्ताहरु ओईरिएका छन् । बुधबार केही निर्जिबन बिमा कम्पनी र होटलहरुहरुको शेयर मूल्य १० प्रतिशतले बढेको छ । बिमा कम्पनीहरुले यस बर्ष नगद लाभांश बाड्न नपाउने, बोनस र हकप्रद शेयर जारी गरेर कम्तिमा दोब्बर पुँजी थप्नुपर्ने अबस्था आउनसक्ने आँकलन गरिएको बेला ती कम्पनीहरुले गत बर्ष गरेको कमाई सार्वजनिक हुनुले पनि लगानीकर्तालाई तानेको देखिएको छ ।
त्यस्तै राष्ट्र बैंकले यही भदौ महिना भित्र बैंक तथा बित्तीय संस्थाहरुलाई चार गुणासम्म पूँजी बृद्धिको योजना पेश गर्न कडा निर्देशन दिएको, कमाएको नाफालाई नगद लाभांश बाड्न नपाई बोनस शेयर दिएर पूँजी बृद्धि गर्न बाध्य पारिएकोले पनि लगानीकर्तामा आत्मबल बढेको देखिएको छ । यही मौकामा सीडीएस एण्ड क्लियरिङ लिमिटेडले बजारमा ६० प्रतिशत हिस्सा रहेका बाणिज्य बैंकहरुको अभौतिक शेयर मात्र किनबेच हुने गरी कारोबार थालेकाले बजारमा बिक्रीमा आउने शेयरको अभाव भई मूल्य बढ्न गएको अबस्था छ ।
यसमा दलहरु नयाँ संबिधान लेखनको अन्तिम गृहकार्य सकेर संबिधान जारी गर्ने तरखरमा रहेकाले झन्. अनुकुल वातावरण सिर्जना गरेको छ । बैंक तथा बित्तीय क्षेत्रमा अधिक तरलता भए पनि लगानीको विकल्प नभएकाले शेयर बजारतर्फ रकम आकर्षित हुने क्रम बढेको छ ।
