कोरियाको तीन सहरहरुमा एकै दिन तमू ल्होसार मनाउने
कोरिया स्थित जातीय संस्था तमू धींले एकै दिन प्रमुख तीन सहरहरुमा आफ्नो मौलिक पर्व तथा नयाँ वर्ष तमू ल्होसार आउँदो जनवरी १ तारिक मनाउने भएको छ । तमू समुदायको वर्ग चक्र अनुसार तो-ल्हो (बाघ वर्ग) लाई विदाई र ही-ल्हो (बिरालो वर्ग) लाई स्वागत गर्दै कोरियाको सउल स्काई पार्क होटल, थेगुको मेइल गार्डेन र बुसानको जिकेएस हलमा दिउँसो १२ बजेदेखि शुरु हुने गरी एकैपटक ल्होसार मनाउने भएको हो ।
तमू धीं दक्षिण कोरिया केन्द्रद्धारा आयोजित सउल दोङ्देमुनमा अवस्थित स्काई पार्क होटलमा मनाइने ल्होसारमा नेपालबाट आमन्त्रित कलाकार उषा गुरुङको प्रस्तुति रहने संस्थाका केन्द्रीय अध्यक्ष लेसन गुरुङले जानकारी दिए । उता तमू धीं दक्षिण कोरिया थेगु शाखाको आयोजनामा मेइल गार्डेनमा मनाइने ल्होसारमा दि भ्वाइस अफ नेपाल सिजन ४ नकआउट राउण्ड सम्मको यात्रा तय गरेकी कलाकार पवित्र गुरुङको प्रस्तुति रहने सोही शाखा अध्यक्ष गणेश गुरुङले बताए । समय सापेक्षित विभिन्न कार्यक्रम गर्दै आइरहेको तमू धीं ख्यङ्साङ्नाम्दो बुसान शाखाले भने बुसानको जिकेएस हलमा स्थानीय कलाकारहरुको साथमा ल्होसार मनाउने ब्यापक तयारी भइरहेको सोही शाखा अध्यक्ष कर्ण गुरुङले स्पष्ट पारे ।
सोही अवसरमा शुभकामना आदानप्रदान कार्यक्रम रहने र तमू समूदायको मौलिक गीत घाँटु, झोरा, कौडा तथा सोरठी लगायतको प्रस्तुति सहित स्वादिष्ट नेपाली खानाको व्यवस्था गरिने उक्त “तमू ही-ल्होसार २०७९” लाई सफल बनाउन कोरियामा रहेका सम्पूर्ण तमू तथा गैर तमू दाजुभाई, दिदीबहिनीहरु एवं संघसंस्थाहरुलाई आफूलाई पायक पर्ने स्थानमा गरिमामय उपस्थितिको लागि आयोजकले अनुरोध गरेको छ ।
