पाँचौ संस्करणको “छेजुदो भ्रमण” ब्यापक सहभागिताका साथ सम्पन्न

दक्षिण कोरिया स्थित मिर्याङ नेपाली समाजले कोरियन पर्व छुसकको अवसर पारेर “पाँचौ छेजुदो भ्रमण” कार्यक्रम सम्पन्न गरेको छ । यही सेप्टेम्बरको गत ९ देखि ११ तारिकसम्म रहने गरी तीन दिने उक्त भ्रमण कार्यक्रम आयोजना गरिएको हो ।

सउल क्षेत्रको लागि दोङ्देमुनबाट १ सय १६ जना, किम्हे र बुसान क्षेत्रको लागि किम्हेबाट ३७ जना, थेगु क्षेत्रको लागी मिर्याङबाट ४७ जना र मोक्पोबाट ८ जना गरी २ सय ८ जना भ्रमणमा सहभागी रहेका थिए । जाने बेला मोक्पोसम्म बस र मोक्पोबाट छेजुदो सम्म पानीजहाजको व्यवस्था रहेको थियो भने र फर्किने बेला छेजुदोबाट जिन्दो बन्दरगाहसम्म पानीजहाज र त्यसपछि सम्बन्धित गन्तव्यसम्म बसको व्यवस्था गरिएको समाजका संरक्षक सागर पोख्रेलले जानकारी दिए ।

यो पटकको छेजुदो भ्रमण समाजको पाँचौ संस्करण अन्तर्गत रहेको र अहिलेसम्मकै ठूलो संख्याको सहभागीता रहेको बताउँदै वर्षेनी नियमित रुपमा आयोजना गर्दै आएको भएपनि वितेको दुई वर्ष यता कोरोना कहरको कारण भ्रमण कार्यक्रम स्थगित गर्नुपरेको र अहिले जनजीवन सामान्य बन्दै गएको सन्दर्भमा सहभागिता थप ब्यापक र उत्साहजनक भएको समाजका अध्यक्ष मिलन तामाङले स्पष्ट पारे । छेजुदो जाने आउने, भ्रमणको क्रममा सम्पूर्ण प्रवेश शुल्क आयोजकले व्यहोर्ने व्यवस्था, नि:शुल्क दिनको ३ पटक खानाको व्यवस्था र जोडी (कपल) को लागि छुट्टै रुम तथा इन्स्योरेन्स समेत लगायतको सम्पूर्ण सुविधा प्याकेजमै समावेश गरिएको र प्रत्येक बसमा आयोजकको प्रतिनिधि उपस्थित भएर भ्रमणमा सहभागी हुने सबैलाई सहज भएको संस्थाका उपाध्यक्ष साजन थापाले बताए । छेजुदो पुगेर पनि समूह वर्गीकरण गरेर प्रक्रियागत र सौहार्दपूर्ण वातावरणमा प्याकेजमा उल्लेखित सबै स्थानमा भ्रमण कार्यक्रम सम्पन्न गरेकोले पनि आयोजक संस्थाप्रति सहभागीहरु सन्तुष्ट भएको संस्थाकी कोषाध्यक्ष प्रिती लामाले दावी गरिन् ।

समाजले व्यवस्थापकीय पक्षमा केही त्रुटी र कमीकमजोरी वा असुविधा हुन पुगेमा सहभागीहरु समक्ष क्षमा माग्दै रचनात्मक र सकारात्मक राय सुझावको अपेक्षा सहित आउँदो दिनहरुमा सुधार्दै लैजाने प्रतिबद्धता जनाएको छ । भ्रमण सफल बनाउन सहभागिता जनाउनुहुने, आर्थिक, नैतिक र सहजीकरण गर्नुहुने सम्पूर्ण नेपाली दाजुभाई तथा दिदीबहिनीहरुमा आयोजक संस्थाले हार्दिक धन्यवाद र आभार व्यक्त गरेको छ ।