स्याङ्जा परिवार दक्षिण कोरियाको रजतोत्सव धूमधामका साथ सम्पन्न
कोरियास्थित क्षेत्रीय संस्था स्याङ्जा परिवारले आफ्नो स्थापनाको २५औं वर्ष पूरा गरेको उपलक्ष्यमा आयोजित रजतोत्सव समारोह भव्य रुपमा सम्पन्न भएको छ । गत आइतबार सउलस्थित 서울시 중구 정동길 3 경향신문사 12충 को हलमा कोरियन पर्व छुसकको अवसर पारेर सो रजतोत्सव समारोह सम्पन्न भएको हो ।
“कोरियामा स्याङ्जाली, रजतोत्वस यसपाली” भन्ने नारासहित सम्पन्न सो रजतोत्सव समारोहमा संस्थाका केन्द्रीय अध्यक्ष तथा रजत जयन्ती मूल आयोजक समिति संयोजक विजय थापाको अध्यक्षता, प्रमुख अतिथि नेपाली राजदुतावास सउलका श्रम काउन्सिलर रमा भट्टराई, विशिष्ट अतिथिहरु एनआरएनए कोरियाका अध्यक्ष दिपक पुन, एनसिसि कोरियाका अध्यक्ष श्री प्रसाद श्रेष्ठ, स्याङ्जा सहयोग समाज अन्तर्राष्ट्रिय समन्वय समितिका अध्यक्ष टुकराज अर्याल र एनआरएनए आईसिसि सचिव जुनु गुरुङ रहेका थिए भने अतिथिहरुमा संस्थाका वरिष्ठ सल्लाहकारहरु, पूर्वाध्यक्षहरु सल्लाहकार, सल्लाहकारहरु, संस्थाका विभागीय प्रमुखहरु, खेलाडीहरु, किम्हे/बुसान र थेगु शाखाका अध्यक्षहरु, शाखाका सल्लाहकारहरु, केन्द्र एवं शाखा सम्बद्ध कार्यसमिति पदाधिकारी तथा सदस्यहरु, विभिन्न क्षेत्रिय संस्थाका अध्यक्ष तथा प्रतिनिधिहरु उपस्थित रहेका थिए ।
सन् १९९७ मा स्थापित वर्तमानसम्मको सम्पूर्ण संस्थागत गतिविधि, जिल्लाको संक्षिप्त परिचय, भौगोलिक अवस्थिति, धार्मिक तथा पर्यटकीय स्थलको जानकारी, प्रवासी भूमिमा रहँदाको अनुभूति/विचार, कोरियामा आर्जित ज्ञान, सीप र पूँजीको उपयोग, लगानीको अवस्था, सम्भावना र चुनौती, साहित्यिक लेख/रचना लगायतको विषय समेट्दै स्मारिका प्रकाशन गरिएको र रजत जयन्तीकै अवसर पारेर स्मारिका पुस्तक विमोचन कार्यक्रम जोडिएको थियो । कोरिया स्थित विभिन्न संघसंस्था, व्यवसायीहरुसँगको सम्बन्ध र समन्वयमा थप आत्मीयता कायम राख्दै संस्थाले शुभकामना तथा विज्ञापन संकलन गर्दै सहयोगीहरुको नामावली स्मारिका पुस्तकमा समावेश छ । यसका साथै स्थापनाकालदेखि विभिन्न समयमा आर्थिक, भौतिक, नैतिक तथा जिन्सी वा सामाग्रीहरु उपलब्ध गराउनुहुने सहयोगी र रजत जयन्ती समारोहलाई सफल बनाउन आर्थिक सहयोगी सम्पूर्णलाई सम्मान गरिएको थियो ।
गौरवशाली इतिहास बोकेको स्याङ्जा परिवार दक्षिण कोरियाको रजत जयन्तीलाई सफलतापूर्वक सम्पन्न गर्न कोरियास्थित विभिन्न संघसंस्था, संस्था सम्बद्ध व्यक्तित्व, समस्त शुभचिन्तक, सम्पूर्ण नेपाली दाजुभाई तथा दिदीबहिनीहरुमा आर्थिक, नैतिक र भौतिक सहयोगको लागी संस्थाले हार्दिक धन्यवाद व्यक्त गरेको छ ।
