स्याङ्जा सहयोग समाज अन्तर्राष्ट्रिय समन्वय समितिको शुभकामना आदानप्रदान तथा भित्तेपात्रो विमोचन कार्यक्रम सम्पन्न
“समृद्ध स्याङ्जाको लागि विश्व अभियान” भन्ने विशाल अभियानका साथ स्थापित विश्वभरका स्याङ्जालीहरुको साझा संस्था स्याङ्जा सहयोग समाज अन्तर्राष्ट्रिय समन्वय समितिले नेपाली नयाँ वर्ष बि.सं.२०७९ को पावन अवसरमा शुभकामना आदानप्रदान तथा भित्तेपात्रो विमोचन कार्यक्रम सम्पन्न गरेको छ । संस्थाका अध्यक्ष टुकराज अर्यालको अध्यक्षता तथा प्रा. डा. दिलबहादुर क्षेत्रीको प्रमुख आतिथ्य एवं विभिन्न विशिष्ट व्यक्तित्व, समाजका संरक्षक, सल्लाहकार वर्तमान एवं पूर्व कार्यसमिति पदाधिकारीको उपस्थितिमा स्याङ्जा स्थित संस्थाको केन्द्रीय कार्यालय पुतलीबजारमा सो कार्यक्रम सम्पन्न भएको हो ।
सो कार्यक्रममा प्रमुख अतिथि प्रा.डा. दिलबहादुर क्षेत्त्रीद्धारा दिप प्रज्वलन र ब्यानर अनावरण गरी कार्यक्रम उद्घाटन गरेका थिए । प्रा.डा क्षेत्रीले समाज स्थापना र यसले गरेका विभिन्न कार्यको प्रशंसा गर्दै सदैव यसरी नै सबैको साथ र सहयोगमा उच्च मनोबलका साथ सफल नेतृत्व दिदै अगाडि बढिरहन शुभकामना दिएका थिए । कार्यक्रमको अन्त्यमा संस्थाको अध्यक्ष टुकराज अर्यालले संस्थाका गतिविधि र वर्तमान समितिको वार्षिक दीर्घकालीन कार्ययोजना बारेमा जानकारी गराउँदै सफल कार्यसम्पादनको लागि सबैको सहयोगको आग्रह गरे ।
उक्त कार्यक्रममा संस्थाका विशिष्ट अतिथिहरुमा मोहन गुरुङ, होगी गुरुङ, संरक्षक अनन्त श्रेष्ठ, शालिकराम ड्रुम्रे, प्रमुख सल्लाहकार प्रकाश श्रेष्ठ, सल्लाहकार योगेन्द्रमान श्रेष्ठ, संस्थाका वरिष्ठ उपाध्यक्ष भोला पौडेल, सचिव मीन क्षेत्री, पदेन सदस्य अजमत अलि लगायतले शुभकामना मन्तव्य राखेका थिए ।
कार्यक्रममा संस्थागत योगदानको आधारमा विभिन्न संघसंस्थालाई कदर पत्रद्धारा सम्मान गरिएको थियो । संस्थाकी महिला संयोजक निर्मला तिवारीले स्वागत मन्तव्यसँगै शुरु भएको उक्त कार्यक्रममा संस्थाका महासचिव मुक्ति सुवेदीले कार्यक्रम सञ्चालन गरेका थिए ।
