चितवन सम्पर्क समिति द.कोरियाको सत्रौं अधिवेशनबाट राजकुमार स्याङ्तन नेतृत्वको कार्यसमिति गठन
चितवन सम्पर्क समिति दक्षिण कोरियाको सत्रौं अधिवेशन भर्चुअल जूम मार्फत सम्पन्न भएको छ । आइतबार विजय अर्यालको सभाध्यक्ष र माननीय पूर्व अर्थमन्त्री सुरेन्द्र प्रसाद पाण्डेको प्रमुख आतिथ्यतामा सो अधिवेशन सम्पन्न भएको हो ।
संस्थाको वरिष्ठ उपाध्यक्ष राजकुमार स्याङ्तनको स्वागत मन्तव्यसँगै शुरु भएको उक्त अधिवेशनमा संस्थाका कोषाध्यक्ष रामकुमार चौधरीले प्रगति प्रतिवेदन र सम्पूर्ण आर्थिक आयव्यय विवरण प्रस्तुत गरेका थिए । “चितवन सम्पर्क समिति दक्षिण कोरियाको चाहना, समृद्ध चितवन हाम्रो परिकल्पना” भन्ने मूल नारालाई आत्मासाथ गर्दै सन् २००१ मा स्थापित चितवन सम्पर्क समितिको उक्त अधिवेशनमा विशिष्ट अतिथिहरुमा संस्थाका संस्थापक संरक्षक जगन्नाथ वली, वरिष्ठ सल्लाहकार गिरीराज कुँवर, निवर्तमान अध्यक्ष लिलाकान्त महतो, वुमन फर वुमन फरका निवर्तमान अध्यक्ष पद्मा श्रेष्ठ, चितवन सेवा समाज अन्तर्राष्ट्रिय समन्वय समिति नेपालका अध्यक्ष समीर के.सी. र सोही संस्थाको संयोजक राजन श्रेष्ठ, एनआरएनए कोरियाका अध्यक्ष दीपक पुन, बागमती प्रदेश दक्षिण कोरियाका वरिष्ठ उपाध्यक्ष सूरज दर्लामी लगायत अतिथिको रुपमा कोरियास्थित क्षेत्रीय, राजनैतिक, जातीय, धार्मिक लगायत विभिन्न संघ-संस्थाका अध्यक्ष तथा प्रतिनिधिहरुले अधिवेशन सफलताको शुभकामना सहित आ-आफ्नो मन्तव्य प्रस्तुत गरेका थिए ।
उद्घाटन सत्रपछिको बन्द सत्रमा संस्थापक संरक्षक जगन्नाथ वलीको संयोजकत्वमा सदस्यहरु डा. किशोर कोईराला र पद्मा श्रेष्ठ सहित बनेको निर्वाचन मण्डलले निर्वाचन सम्बन्धी सम्पूर्ण प्रक्रिया पूरा गर्दै नव गठित कार्यसमितिलाई सपथ ग्रहण गराएका थिए । संस्थाको सत्रौं अधिवेशनबाट अध्यक्षमा राजकुमार स्याङ्तन, वरिष्ठ उपाध्यक्ष सागर सापकोटा, उपाध्यक्ष समुन्द्र अर्याल, उपाध्यक्ष अमित चौधरी, महासचिव विनोद चौधरी, सचिव पूर्णकला कुँवर, सचिव गोविन्द चौधरी, कोषाध्यक्ष रामकुमार चौधरी र सदस्यहरुमा देव चौधरी, रविन्द्र बुढाथोकी, अजित लामा सर्वसम्मत चयन भएका छन् ।
जूम भर्चुअलमा थाकस कोरियाका अध्यक्ष शिव शंकर थारुको विशेष प्राविधिक सहजीकरणसँगै कार्यक्रम सञ्चालन संस्थाका महासचिव सागर सापकोटाले गरेका थिए । चितवन सम्पर्क समिति दक्षिण कोरियाको सत्रौं अधिवेशनलाई सफल बनाउन प्रत्यक्ष, अप्रत्यक्ष रूपमा जूम भर्चुअल मार्फत जोडिएर सहयोग गरिदिनुहुने उपस्थित समस्त महानुभावहरुलाई आयोजकले हार्दिक धन्यवाद व्यक्त गरेको छ ।
