कोरियाको नामी सममा विताएका चार घण्टा
दक्षिण कोरियाको एक प्रसिद्ध पर्यटकीय स्थान नामी सम अर्थात नामी टापु पुग्ने मौका यो पाली जुरयो । कोरियामा जोसेन वंशको सातौँ राजा सेजोको पालामा त्यस बेलाका प्रख्यात सैनिक जनरल नामीलाई राजद्रोहको झुटा मुद्दा लगाई मृत्युदण्ड दिए पश्चात उनकै नाममा सन 1944 मा हान नदीलाइ थुनेर बनाइएको मानव निर्मित यस आइसल्याण्डमा बार्षिक 30 लाख भन्दा बढिले भ्रमण गर्ने गर्दो रहेछन् , जुन ठाउँ कोरियाको राजधानी सौल देखि 54 किलोमिटरको दुरीमा अबस्थित छ। चिल्ला र फराकिला सडकका साथै रेल मार्गको पहुँच समेत रहेको सो स्थानमा धेरैले शरद ॠतुमा बिभिन्न रङमा सजिएका पातहरू र वसन्त ऋतुमा फूल्ने फूलहरूको मनमोहक दृश्य कैद गर्न पुग्ने गर्छन्।
कमैले मात्र त्यस आइसल्याण्डमा संरक्षण गरेर राखिएका पशु पंक्षीहरूलाइ महत्व दिन्छन्, यस पटकको भ्रमणमा रङ्गिचङ्गी पातहरू धेरै झरिसकेको हुनाले मैले त्यहाँ रहेको अष्ट्रिच,डाँफे, खरायो, न्याउरीमुसाहरू संग बढि समय व्यतित गरेँ। कस्तो मनोरम! मान्छेहरू संग मिलनसार भैसकेका ति पशु र पंक्षीहरूको चञ्चलताले मन निकै प्रफुल्लित भयो, पार्कभित्र रहेको कोरियन म्युजिक संग्राहलय, पुस्तक संग्राहलयको समेत अबलोकन भयो, भोक मेटाउनको लागि पार्क भित्रै पर्याप्त खाजा घरहरू रहेका छन् साथै पर्याप्त सार्वजनिक सौचालयहरू छन, फोहोर ब्यबस्थापनको लागी ठाउँ ठाउँमा फोहोर जम्मा गर्ने डस्टविनहरू राखिएकोले पार्कमा कतै पनि फोहोर देखिँदैन,।
पार्क घुम्दै जाँदा अन्य देशहरू संगै नेपालको झण्डा र नमस्कार अङ्कित समानान्तर चतुर्भुज समेत भेटियो , अन्य भन्दा निकै पृथक रहेको नेपालको त्रिकोणयुक्त झण्डा गर्व गर्न लायक देखिन्थ्यो। करिब चार घण्टाको हतारको घुमाई पर्याप्त हुने कुरै थिएन, मनोरञ्जनका लागि बन्जी जम्प, जीप फ्लाई, जल सफर, आइसल्याण्ड भित्र कुद्ने रेल साथै साईकल लगायतका बिभिन्न साधनहरू भाडामा लिएर समेत उक्त ठाउँको सफरलाई अरू यादगार बनाउन सकिने रहेछ, समग्रमा भन्नुपर्दा पर्यटकलाई बिहान देखि बेलुकी सम्म मज्जाले भुलाउन सक्षम छ नामिसम ।
मिति 13 नोभेम्बर 2021 को दिन कोरियाको उइजंबु बिदेशी परामर्श केन्द्रको प्रायोजनमा कोरियाको ख्यङ्गिदो प्रान्तमा रहेर कृषि फार्ममा काम गरिरहेका नेपाली र म्यानमार कामदारहरूको लागि कोरियाको खाङ्वन्दो प्रान्तमा रहेको नामिसम आइसल्याण्डमा संयुक्त भ्रमण कार्यक्रमको आयोजना गरेको थियो जसमा नेपालीहरूको नेतृत्व उइजंबु बिदेशी परामर्श केन्द्रमा दोभासेको रूपमा काम गरिरहनु भएका लाक्पा शेर्पा सरले गर्नुभएको थियो।
