कोरिया आउन नपाएका इपिएस पीडितहरुलाई खुशीको खबर
इपिएस मार्फत रोजगारीको लागि दक्षिण कोरिया आउन लागेको नेपालीहरुमा खुशीको खबर छाएको छ । कोरियन भाषा पास गरी इपिएस प्रणालीको प्रकृयामा रहदै गर्दा गत वर्षदेखि कोरोनाका कारण कोरिया प्रवेश गर्न नसकेपछि निकै मानसिक तनाब झेल्दै आएका थिए । त्यसैले इपिएस संघर्ष समिती गठन गरी कोरिया प्रवेश गराउन संम्बन्धीत ठाउँमा विभिन्न दवाब मुलक कार्यक्रम गर्दै आएका थिए । लामो समयदेखि संघर्षमा रहेका उनीहरुलाई हाल आएर आशावादी बनाउदै केही राहत मिलेको छ ।
पटक पटकको पहलपछि कोरियन सरकारले केही दिन अघि तीन सर्त राखी सो सर्त पुरा गर्न सके कोरिया ल्याउने जानकारी दिएका थिए । करिब पाँच हजार डलर बराबरको कोरोना विमा गर्नुपर्ने, कोरिया भित्रिएपछि १४ दिनको क्वारेन्टाइनको खर्च र काठाण्डौबाट सउल सिधा हवाई उडानको खर्च कामदार स्वयमले व्यहोर्नुपर्ने सर्त राखेका थिए ।
सर्त अनुसार नेपाल सरकार इपिएस शाखा कार्यलयले कोरोना विमाको लागि सूचना जारी गर्दै नेपालका ६ वटा विमा कम्पनीहरुको नामवली सार्वजनिक गरेको छ । जसमा अजोड इन्स्युरेन्स लिमिटेड, प्रिमियर इन्स्युरेन्स कम्पनी नेपाल लि., शिहर इन्स्युरेन्स कम्पनी लिमिटेड, एनएलजी इन्स्युरेन्स कम्पनी लि., प्रभु इन्स्युरेन्स लि., आइएमई जनरल इन्स्युरेन्स लि. रहेका छन् । सूचनामा रोजगार अनुमति प्रणाली इपिएस संचालन तथा व्यवस्थापन निर्देशिका २०७३ को दफा २० बमोजिम दक्षिण कोरिया जाने कामदारहरुको कोरिया पुगेको मितीबाट १४ दिनसम्मको लागि ५ हजार डलर बराबरको कोरोना विमा गराउनु पर्ने उल्लेख गरिएको छ ।
सर्त पुरा गर्नको लागि इपिएस संघर्ष समितीले हामी सबै सर्त पुरा गर्न तयार रहेको जानकारी सहित प्रतिबद्धता जनाउनको लागि नेपालको विभिन्न ठाउबाट हस्ताक्षर संकलन गरी ३३ सय ८७ जनाको हस्ताक्षर नेपाल सरकारको बैदेशिक रोजगार विभागलाई बुझाएको छ ।
नेपाली कामदार कोरिया पठाउन प्रकृयागतरुपमा रहेका इपिएस शाखाले बुधबार मात्रै काठमाण्डौबाट सिधै सउल उडान भर्न सक्ने विमानको लागि टेण्डर आवहान गरेको छ । हाल कोरोनाको महामारीका कारण हवाई सेवा सहज नभइरहेको बेला जति परेपनि विमानको टिकट शुल्क कामदार आफैले तिर्न तयार रहेका छन् । कोरोना सुरक्षाको सम्पुर्ण प्रावधान अपनाएर जस्तै सर्त पनि पुरा गरी कोरिया जान आतुर रहेका नेपालका इपिएस पीडितहरुको लागि यो थप खुशीको खबर छाएको छ ।
