तामाङ संघ कोरियाको अधिवेशन सम्पन्न, अध्यक्षमा रवि लामा : संघ अब घेदुङको प्रवास शाखा हुने
नेपाल तामाङ संघ दक्षिण कोरियाको आइतबार १० औं अधिवेशन सम्पन्न भएको छ । अधिवेशनले रवि लामाको नेतृत्वमा नयाँ कार्यसमिति चयन गरेको छ ।
अधिवेशनले नेपाल तामाङ संघ, दक्षिण कोरियालाई तामाङ समुदायको पुरानो संस्था नेपाल तामाङ घेदुङको प्रवास शाखाको रुपमा अघि वढाउने निर्णय पनि गरेको छ । अधिवेशनले नयाँ विधान पारित गरेसँगै संघको नाम परिवर्तन भएर नेपाल तामाङ घेदुङ दक्षिण कोरिया हुने भएको छ ।
त्यस्तै दक्षिण कोरियाको ख्याङसान क्षेत्रमा रहेको तामाङ समाज ख्याङसान बुसान पनि घेदुङ कोरियाको शाखाको रुपमा रहने भएको छ । ‘यो निर्णयसँगै दक्षिण कोरियामा रहेका सबै तामाङ समुदाय एउटै छाता संगठनमा रहने भएको छ । यो हाम्रो लागि पनि ऐतिहासिक दिन हो । कोरिया लगाएत विश्व भरिकै तामाङ समुदायलाई सकारात्मक सन्देश हुन सक्छ ।’ घेदुङको नवनिर्वाचित अध्यक्ष रवि लामाले भने ।
संघको अधिवेशनलाई नेपाल तामाङ घेदुङ केन्द्रका अध्यक्ष मोहन गोले, अन्तराष्ट्रिय तामाङ परिषदको बरिष्ठ उपाध्यक्ष टासी लामा, नेपाली राजदुतावास सउलकी श्रम काउन्सलर रमा भट्टराई, नेपाल आदिवासी जनजाती महासंघका अध्यक्ष युगेल टेन्डुप शेर्पा, गैर आवासीय नेपाली संघ अध्यक्ष यज्ञराज सुवेदी, नेपाली सम्पर्क समितीका अध्यक्ष श्रीप्रसाद श्रेष्ठ शुभकामना व्यक्त गरेका थिए । त्यस्तै तमु धिँ दक्षिण कोरिया अध्यक्ष जित गुरुङ, नेपाल मगर संघ दक्षिण कोरिया अध्यक्ष टेक पुन, किराँत याख्थुङ्चुम्लुङ दक्षिण कोरिया अध्यक्ष मिराक लिम्बू लगाएतले कार्यक्रमलाई सम्बोधन गरेका थिए ।
विदेशमा तामाङ समुदायको लागि काम गर्ने संस्थाहरु तामाङ समाज जापानकी अध्यक्ष रुबिना तामाङ, तामाङ सोसाइटी अफ नर्थ अमेरिकाका अध्यक्ष लक्यान लामाले पनि अधिवेशनमा आफ्नो भनाई राखेका थिए ।
कोरोनाको कारण जुम मार्फत भएको अधिवेशनबाट बरिष्ठ उपाध्यक्षमा राजकुमार स्याङ्तान, उपाध्यक्षमा राम ब्लोन तामाङ, महासचिवमा शुभराज भोम्जन, सचिवमा प्रिति लामा वाइबा र वि.वि. स्याङ्तान चयन भएका छन् । त्यस्तै कोषाध्यक्षमा सुरेश थोकर, सहकोषाध्यक्षमा युनिका माम्बा तामाङ रहेका छन् । त्यसै गरी सदस्यहरुमा दावा फिन्जु तामाङ, ताराबहादुर तामाङ, पूर्णबहादुर तामाङ, सुवास पाख्रिन रहेका छन् ।
