कोरियामा शुक्रबारदेखि कोरोना विरुद्ध खोप लगाउन शुरु

दक्षिण कोरियामा शुक्रबारदेखि कोरोना विरुद्धको खोप लगाउन शुरु गरेको छ । पहिलो पटक सउलका ६१ वर्षिय महिला स्वास्थ्यकर्मीबाट शुरुवात गरी देशैभरीका विभिन्न स्थानबाट पहिलो चरणको खोप लगाउन शुरुवात गरिएको हो ।

व्रिटिस स्विडेनी फार्मास्यूटिकल विशाल एस्ट्राजेनेको साझेदारीमा कोरिया स्थित एसके वायोसाइन्स कम्पनीद्धारा निर्मित एस्ट्रेजेनेका खोप लगाउन शुरुवात गरिएको छ । पहिलो चरणमा ७ लाख ८५ हजार जनालाई दुई डोज लगाउन सकिने खोप तयार परिएको छ । ६५ वर्ष भन्दा मुनीका स्वास्थ्यकर्मी र अस्पतालमा उपचार्थ विरामीहरुलाई पहिलो चरणमा खोप लगाउदै छन् । स्वास्थ्यअधिकारीहरुका अनुसार पहिलो चरणको खोप मार्चसम्म लगाइ सकिने छन् ।

आगामी चार दिनभित्र देशका कुना काप्चामा रहेका स्वास्थ्य केन्द्रहरुमा खोपा पुराउने भएका छन् । शनिबारदेखि ५५ हजार स्वास्थ्यकर्मीहरुकोे लागि अमेरिकी फार्मास्यूटिकलले बनाएको फाइजर खोप लगाउने भएका छन् ।

खोपको प्रतिकुल प्रभावले कुनै पनि व्यक्ति विरामी भए सम्पूर्ण खर्च सरकारले गरिदिने भएका छन् । सरकारले विदेशी औषधी कम्पनीहरुसंग सम्झौता गरी प्रसस्तै खोपको व्यवस्था गरेको दावी गर्दै नोभेम्बरसम्म कुल जनसंख्याको ७० प्रतिशतलाई खोप लगाउने योजना लिएको छ ।