दक्षिण कोरियाको सउलमा चलचित्र “छ माया छपक्कै” प्रदर्शन हुने
नेपाल तामाङ संघ दक्षिण कोरियाले राजधानी सउलमा चलचित्र “छ माया छपक्कै” प्रदर्शन गर्ने भएको छ । आगामी नोवेम्बर १७ तारीखका दिन दोङदेमुन स्थित जोङ्नो खुमिन होइग्वन(종로 구민 회관)मा चलचित्र प्रदर्शन गर्न लागेको हो । यसको सम्पुर्ण तयारी समेत पुरा भैसकेको जनाएको छ ।
संघले संचालन गरेको सउलको दोङ्देमुन स्थित सेल्टर (तामाङ धिम)को दीर्घकालीन ब्यबस्थापन गर्ने उदेश्यले उक्त चलचित्र प्रदर्शन गर्न लागेको जानकारी संघका अध्यक्ष मेगप्रसाद वाईबाले दिएका छन् । “चलचित्र प्रदर्शनबाट भएको आम्दानीमा हामीले थप गरेर तामाङ धिम संचालन गर्नेछौं । यसलाई हामीले तामाङ कला र संस्कृतिक पहिचान झल्किने गरि ब्यबस्थापन गर्नेछौं ।” उनले भने ।
नेपाली चलचित्र घामपानी र गोपी चलचित्र पछि युवा निर्देशक दिपेन्द्र लामाको चलचित्र “छ माया छपक्कै” नेपालमा अक्टोबर ११ देखि अत्याधिक सफलताका साथ प्रदर्शन भएको छ । सोही चलचित्र दक्षिण कोरियाको अन्य विभिन्न सहरहरूमा पनि प्रदर्शन हुने क्रम्मा रहेको जनाएको छ ।
त्यस्तै उक्त दिन हुने चलचित्र प्रदर्शनको सम्पुर्ण तयारी पुरा भएको चलचित्र प्रदर्शन तयारी समितीका संयोजक तथा संघका उपाध्यक्ष बुद्ध लामाले जानकारी दिएका छन् । गत आइतबार मात्र पोस्टर समेत सार्वजनिक गरेको जानकारी दिदै संयोजक लामाले कोरियामा रहेका सम्पुर्णलाई सहभागी हुन अनुरोध समेत गरेका छन् । “मनोरञ्जनको साथ साथै समाजिक भावनाले नेपालमा चलिरहेको सुप्परहिट चलचित्र यहाँ(कोरियामा) पनि प्रदर्शन गर्न लागेको हो । त्यसैले कोरियामा रहनु भएका सम्पुर्ण दाजुभाइ तथा दिदीबहिनीहरुलाई उपस्थित हुन हार्दिक अनुरोध गर्द्छु ।” लामाले भने ।
दिप्रेन्द्र लामाको कथा र निर्देशनमा बनेको चलचित्रमा दिपकराज गिरी, केकी अधिकारी, केदार प्रसाद घिमिरे (माग्ने बुढा), जितु नेपाल (मुन्द्रे), स्वपुष्प भट्टा, बुध्दि तामाङ (हैट), प्रकाश घिमिरे, रमा थपालिया, शिशिर भडेल, अनुराघ कुवाँर, बिष्णु सापकोटा, सबिन बास्तोला, बसन्त भट्टा, शारदा गिरी, दिपक क्षेत्री, सुनिता गौतम, राजनी गुरूङ, कुमार गजुरेल, सन्देश लामिछाने, देव जोशी, प्रदिप न्यौपाने र भिम श्रेष्ठ लगायतका कलाकारहरूको अभिनय देख्न सकिन्छ ।