कोरियाको विपक्षी नेताले “बिदेशी मजदुरको केहि योगदान छैन” भनेपछि प्रवासी मजदुरको बिरोध

दक्षिण कोरियाको कोन्जर्भेटिव लिबर्टी कोरिया पार्टी (LKP) को अध्यक्ष ह्वाङ ग्यो-हनले विदेशी कामदार प्रति पुरातन सोच र घृणा जगाउने खालको अभिव्यक्ति दिएको भन्दै प्रवासी मजदुर नेताहरुले चर्को आलोचना गरेका छन् । साथै उक्त भनाइ फिर्ता लिन दबाब दिएका छन् ।

समाचार एजेन्सी योन्हापका अनुसार नेता ह्वाङको उक्त भनाइ विरुद्ध प्रवासी मजदुर संगठनहरुले SMI-एसएमईको सउल स्थित मुख्यालय अगाडि प्रदर्शन समेत गरेका छन् । साथै विरोध प्रदर्शनमा प्रवासी मजदुर संगठन एमटियुको पनि सहभागीता रहेको र पत्रकार सम्मेलन गरि बिरोध पत्र समेत बुझाइएको जानकारी एमटियु अध्यक्ष उदय राइले दिएका छन् ।

नेता क्यो-हनले बुधबार बुसानमा भएको साना तथा मझौला कम्पनी(SMI-एसएमई)को प्रमुख कार्यकारीहरु सँगको छलफलको क्रममा विदेशी कामदारहरुका लागि छुट्टै न्युनतम ज्याला निर्धारण गर्नुपर्ने भनाइ राखेका थिए । उसले बिदेशी कामदारले देशको लागि केही योगदान दिएको छैन भन्ने भनाइ राखे । “त्यसैले मलाई लाग्छ कि कोरियन र विदेशी कामदारको लागि एउटै ज्याला प्रणाली लागु गर्नु ठिक छैन ।” उसको भनाइलाई उद्धृत गर्दै कोरिया टाइम्सले लेखेको छ ।

कानुनी विश्लेषकहरुले ह्वाङको उक्त भनाइ सरासर गैरकानुनी भएको जनाएको छ । कोरियाको श्रम कानुन अनुसार लिङ्ग, राष्ट्रियता, धर्म तथा सामाजिक अवस्थाको आधारमा कुनै पनि भेदभाव गर्न पाइने छैन ।

नेताले लिए आफ्नो भनाइ फिर्ता 

यसरी बिरोध भएपछि नेता ह्वाङ “विदेशी मजदुरहरूको न्यूनतम ज्याला घटाउनु पर्छ” भन्ने आफ्नो विवादास्पद भनाइ बाट पछी हटेका छन् । विदेशी मजदुरहरुलाई विभेद गर्नुपर्छ भने आफ्नो आसय नरहेको भन्दै सरकारले अस्वभाविक रुपमा पटक पटक न्युनतम ज्याला बढाएकोमा त्यसको आलोचना गरेको जनाएको छ ।

ह्वाङले आफ्नो वास्तविक भनाइलाई तोडेर अर्कै अर्थ लगाएको भन्दै आफ्नो बचाउ गरेका छन् । उनले कोरियाको लागि अझै धेरै विदेशी कामदार आवस्यकता रहेको समेत बुधबार बताएको छ ।