उत्तर कोरियाले छोटो दूरीको मिसाइल परीक्षण गरेको दक्षिण कोरियाको दाबी
उत्तर कोरियाले केही छोटो दूरीका मिसाइल शनिबार परीक्षण गरेको दक्षिण कोरियाले जनाएको छ । सो परीक्षण देशको पूर्वी भागमा रहेको होडोे प्रायदिपमा गरिएको दक्षिण कोरियाका सेना प्रमुखले जनाएका छन् ।
यदि यो निश्चित हो भने यो परीक्षण प्योङयाङले सन् २०१७को नोभेम्बरमा गरेको इन्टरकन्टिनेन्टल बालिस्टिक मिसाइलको परीक्षण पछिको दोस्रो हो । गएको महिना प्योङयाङले नयाँ ‘ट्याक्टिकल गाइडेड’ हतियार परीक्षण गरिएको जनाएको थियो ।
त्यो परीक्षण गएको फेब्रुवरी महिनामा भियतनाममा उत्तर कोरियाली नेता किम जोङ उन र अमेरिकी राष्ट्रपति डोनाल्ड ट्रम्पबीचको वार्ता असफल भएपछिको पहिलो थियो । सो शिखर वार्तापछि ट्रम्पले किमका तर्फबाट खराब विषय संझौताका लागि प्रस्ताव गरेको जनाएका थिए ।
शनिबार अमेरिकी राष्ट्रपतिले ट्विट गर्दै उत्तर कोरियाका नेताले आर्थिक सामान्यीकरण र अझ राम्रो सम्बन्ध बनाउनका लागि बनाइएको बाटोलाई अवरुद्ध नगर्ने आफूले विश्वास लिएको जनाएका छन् । उनले आफू उनको साथ रहेको र आफूसँग भएको बाचा उनले तोड्दैनन् भन्ने आशा गरेको अमेरिकी राष्ट्रपतिले उल्लेख गरेका छन् ।
छोटो दूरीको मिसाइल परीक्षणले उत्तर कोरियाले लामो दूरीका मिसाइल परीक्षण नगर्ने भनेर गरेको बाचा भने नतोडिने बताइएको छ । ह्वाइट हाउसका प्रवक्ता सराह स्यान्डर्सले आफूहरुले उत्तर कोरियाका गतिविधि अनुगमन गरिरहने जनाएकी छन् ।
दक्षिण कोरियाका सेना प्रमुखको वक्तव्यमा जनाइए अनुसार उत्तर कोरियाले शनिबार गरेको परीक्षणमा मिसाइल ७० देखि २०० किमी सम्म उडेर जापानी समुन्द्रमा खसेको थियो ।
होडोलाई यसअघि क्रुज मिसाइल र लामो दूरीका हतियार परीक्षणका लागि प्रयोग गरिन्थ्यो । उत्तर कोरियाको समाचार एजेन्सी केसीएनएका अनुसार अप्रिलको परीक्षण नेता किम स्वयंले स्थलगत रुपमा नै निरीक्षण गरेका थिए ।
