छोटो उडान छाडेर किमले किन रोज्छन् सधैँ रेल ?
भियतनामको राजधानी हनोइसम्मको छोटो उडान नलिएर उत्तर कोरियाली नेता किमले किन दुई दिन भन्दा लामो रेल यात्रा गरे भन्नेबारे अहिले निकै चर्चा भइरहेको छ । यसरी अमेरिकी राष्ट्रपति डोनाल्ड ट्रम्पसँगको दोस्रो शिखर सम्मेलनमा सहभागी हुन किमले प्योङयोङबाट चार हजार किलोमिटरको रेल यात्रा तय गरेका हुन् । उनले यात्रा गरेको सो रेल कुनै तिव्र गतिको रेल होइन जसकारण पनि उनको भ्रमण लामो हुन पुगेको बताइएको छ ।
यसरी ६० घण्टाको यात्रापछि मंगलबार मात्र किम भियतनामको दोङहाङ स्टेसन पुगेका हुन् । जसपछि उनलाई कडा सुरक्षाका बीच लिमोमा होटलसम्म लगिएको हो । यसरी किमले करिब तीन दिन लगाएको यो यात्रा विमानमार्फत गरिएको भए केबल १३ घण्टामै सकिने थियो । त्यसैल पनि किमको यात्रालाई धेरै झन्झटिलो मानिएको छ ।
तर वास्तवमा उनले आफ्ना पिता र हजुरबुवाको बाटोमा हिँड्दै पारिवारिक परम्परा जारी राख्ने क्रममा यस्तो निर्णय लिएको बताइएको छ । उनले यात्रा गरेको उक्त हरियो रेललाई उत्तर कोरियाली शाषक परिवारको परम्परागत रेल मानिन्छ ।
किमका पिता जोङ इल र हजुरबुवा इल सङ दुवै विमान उडानसँग डराउँथे । दक्षिण कोरियाली मिडियाका अनुसार १९८२ मा उत्तर कोरियाले गरेको एउटा परीक्षणमा विमान विस्फोट भएपछि नै उनीहरुमा विमानप्रति डर उत्पन्न भएको हो । यसपछि १९८६ मा किम इल सङले गरेको हवाइ यात्रा नै दशकौँसम्म उत्तर कोरियाली प्रमुखको अन्तिम सार्वजनिक हवाइ यात्रा मानिएको थियो ।
तर किम जोङ उनले भने स्वीट्जरल्यान्डमा पढ्दादेखि नै नियमित उडान गरिरहने गरेका थिए । यसरी २०११ मा शाषन सुरु गरेपछि उनले सिंगापूर सम्मेलनमा पनि विमानबाटै यात्रा गरेका हुन् । तर यसपटकको भ्रमणका लागि उनले रेलकै यात्रा चुनेर आफ्नो पारिवारिक परम्परालाई जिवित राख्न खोजेको बताइएको छ ।
किनकी किमले प्रयोग गरेको रेल त्यही रेल हो जसमा उनका हजुरबुवा र पिताले पनि यात्रा गरेका थिए । यसको क्यारिज बुलेटप्रुफ हो भने त्यसभित्र थुप्रै आलिसान कोठाहरु पनि रहेको बताइएको छ । यसरी प्रमुख क्यारिजका अगाडि पछाडि छुट्टाछुट्टै दुईवटा ट्रेन छन् जसले दुईतिरबाट रेलको सुरक्षा सुनिश्चित गर्दछ । यस्तोमा किमको रेल यात्रा विमान भन्दा सुरक्षित र बढी लक्जरीयस रहेको बताइएको छ ।
बाहिरी मानिसहरुले किमको ६० घण्टा लामो यात्रालाई झन्झटिलो देखेपनि किमका लागि भने यो गर्वको कुरा हो । यसअघि सिंगापुर सम्मेलनका लागि उडान भर्दा उनले चीनसँग बोइङ ७४७ माग्नु परेको थियो किनकी उत्तर कोरियाली विमान सो समय असुरक्षित ठहर भएको थियो । यस्तोमा भियतनामसम्मको यात्राका लागि पनि बाहिरी सहयोग माग्नुपर्ने भएपछि किमले कसैमाथि निर्भर नभइ आफ्नै रेलमा सवार भएर जाने निर्णय गरेको बताइएको छ ।
