भानुको स्मरण गर्दै कोरियामा मुक्तक मेला सम्पन्न
सौल, अन्तर्राष्ट्रिय नेपाली साहित्य समाज कोरिया च्याप्टरले आइतबार आदिकवि भानुभक्त आचार्यको स्मरण गर्दै बृहत् मुक्तक मेला सम्पन्न गरेको छ । नेपाली साहित्यका विविध विधाहरूमा केन्द्रित रही कार्यक्रम गरिरहेको कोरिया च्याप्टरले काव्य सुधाको तेस्रो शृङ्खलाको रूपमा नेपाली काव्य जगतका धरोहर आदिकवि आचार्यको २०४ औं जन्मजयन्तीको अवसर पारी उनको स्मरण गर्दै बृहत मुक्तक मेला तथा विविध रचना वाचन कार्यक्रमको आयोजना गरेको च्याप्टरका अध्यक्ष कृष गुल्मेली बाबूले जानकारी दिनुभयो ।
पर्यटकीय शहर तोङ्देमुन स्थित शुभेच्छा रेस्टुरेन्टको सभाहलमा सप्पन्न मुक्तक मेलामा कोरियामा कार्यरत रही मुक्तकमा कलम चलाइरहेका प्रमुख ८ मुक्तककारहरूले भव्य प्रस्तुति रहेको थियो । मुक्तककारहरूले देश, राजनीति, प्रवास र प्रणय मिश्रित मुक्तकहरूले कोरियाको गर्मीमा शीतलता प्रदान गरिरहेको आभास हुन्थ्यो । झन्डै सय जना सहभागीमाझ मुक्तककारहरू प्रमोद सारङ्ग, नारायण भुसाल, गङ्गा बस्नेत, दिपेन्द्र भट्टराई, समीर यात्री, महेन्द्र केसी, रेशम अधिकारी र पूर्वेली गाउँलेका बेजोड मुक्तकहरूको प्रस्तुति रोमाञ्चक रहेको कार्यक्रम संयोजक डि आर न्यौपाने “सूर्य”ले जानकारी दिनुभयो ।
भानुको स्मरण गर्दै कवि विनोद परिवर्तितले रामायणको बालकाण्ड अन्तर्गतका उत्कृष्ट श्लोकहरू सुनाइरहँदा दर्शकदीर्घामा मौनता छाइरह्यो । त्यस लगत्तै स्रस्टाहरू यल्जी विवश, मोहन कार्की, सरोज सर्वहारा, भोजराज जैशी, जनक सन्याल, गोपिकृष्ण लामिछाने, माधव पाण्डे, रामचन्द्र शर्मा, शंकर वि क सङ्गम, डिकर्ण मल्ल लगायतले आफ्ना उत्कृष्ट मुक्तक, गजल र कविता वाचन गर्दा माहौल थप रोमाञ्चक बन्यो ।
उक्त अवसरमा कोरियामा रही विभिन्न संचारमाध्यममा आवद्ध पत्रकारहरू सन्दिप पाण्डे, कृष्ण बस्याल र विकाश श्रेष्ठलाई सम्मान गरिएको थियो भने च्याप्टरका नयाँ सदस्यलाई प्रमाणपत्र प्रदान गरिएको थियो । च्याप्टरले यसअघि उत्कृष्ट कवि तथा चर्चित गजलकारहरूको साथमा कविता वाचन तथा गजल मुशायरा सन्चालन गरिसकेको छ भने हालै मात्र विश्व नेपाली काव्य गोष्ठी तथा अनेसासको एसिया सम्मेलन सम्पन्न गरेको छ ।
