सुनिता मगरलाई घर फर्काउन रकम अभाव
काठमाडौं-दलालले सिरिया पुर्याएर बन्धक बनाइएकी धादिङकी सुनिता मगरको उद्धारका लागि रकमको अभाव भएको छ।
नेपाल फर्किने टिकट किन्न आवश्यक रकमको अभावमा सुनिता द्वन्दग्रस्त मुलुक सिरियाबाट नेपाल फर्कनबाट बञ्चित भएकी छिन्।
धादिङ नीलकण्ठ नगरपालिका –८ मगर गाउँकी सुनिता दलालमार्फत् एक बर्ष अघि सिरिया पुगेकी थिइन्। विवाहको केही बर्षपछि नै श्रीमान्ले सौता भित्र्याएपछि एक छोरा र एक छोरीलाई माइतीमा छोडेर सुनिता वैदेशिक रोजगारीमा गएकी थिइन्।
काम गरेको तलब समेत दलालले अग्रिम भुक्तानी लिएर गएकाले उनको बिचल्ली भएको हो।
फिनल्याण्डमा बस्ने गैर–आवासिय नेपाली संघ(एनआरएन)का सदस्य बालकृष्ण श्रेष्ठको पहलमा सुनिताको पछिल्लो अवस्था पत्ता लागेको हो। हाल धादिङ मैदीका घर भएका श्रेष्ठकै पहलमा सुनिताको पासपोर्ट भेटिएपछि उनलाई त्यहाँबाट उद्धारको प्रयास सुरु भएको हो।
श्रेष्ठका अनुसार खर्च अभावकै कारण सुनितालाई नेपाल फर्काउन सकिएको छैन।
सिरिया पुर्याइएपछि केहि समयअघि उनले माइतीमा आमालाई फोन गरी आफू बाँचेर घर फर्कन सक्ने अवस्था नरहेको भन्दै आफ्नो घरफिर्तीका लागि पहल गर्न आग्रह गरेकी थिइन्। त्यसपछि उनको सकुशल उद्धारका लागि परिवारले हारगुहार गरिरहेको छ।
लामो प्रयासपछि रोजगारदाताले उनलाई घर फर्काउन सहमति जनाएपनि दलालले लगेको रकम फिर्ता दिनुपर्ने शर्त राखेपछि समस्या भएको हो।
सिरियाबाट नेपाल फर्कनका लागि करिब ८ सय अमेरिकी डलर खर्च लाग्ने भएकाले अहिले सोही रकमको अभावले सुनितालाई नेपाल फर्काउन नसकिएको भन्दै श्रेष्ठले सहयोगका लागि आग्रह गरेका छन्। आर्थिक अवस्था कमजोर भएकाले उनको परिवारले यो रकम जुटाउन सकेको छैन।-सेतोपाटि
