कोरियन भाषा परीक्षा चुनावका कारण नरोकिने
काठमाडौं, दक्षिण कोरियामा रोजगारीका लागि जान लिइने भाषा परीक्षा स्थानीय तहको चुनावका कारण नरोकिने सरकारले जनाएको छ । वैदेशिक रोजगार विभाग अन्तरगतको इपीएस कोरिया शाखाका अनुसार चुनावका कारण भाषा परीक्षा हुने,नहुने भन्ने बारे परीक्षार्थीहरुमा अन्योल बढेपछि इपीएस परीक्षा निर्धारित मितिमै हुने बताएको हो ।
इपीएसको परीक्षा जेठको २७ र २८ गते हुँदैछ भने जेठ ३१ गते विभिन्न प्रदेश दोस्रो चरणमा स्थानीय तहको चुनाव भएकाले परीक्षार्थीहरु जाँच सकेर भोट हाल्न पुग्न भ्याउने इपीएस शाखाले बताएको छ । परीक्षामा बाधा नहुने र ढुक्कले परीक्षार्थीले तयारी गर्दा हुने र परीक्षा दिएर गाउँ फर्किएर भोट हाल्न भ्याउने स्थिति शाखाले बताएको हो । यो वर्ष भाषा परीक्षाका लागि ७५ हजार ६ सयभन्दा बढी युवाले आवेदन दिएका थिए । त्यसमध्ये झण्डै ४ सयको फारम अवैध भएकाले खारेज गरिएको छ । कोरियाले यो पटक १० हजार २ सय नेपालीलाई लैजाने जनाएको छ ।
गत वर्ष ३५ सय संख्याका लागि ६० हजार परीक्षार्थी सहभागी भएका थिए । तर, यो पटक कोटा बढेका कारण पनि धेरैको आवेदन परेको छ । यसपटक अनलाइनमार्फत आवेदन लिइएको थियो । यो वर्ष परीक्षा दिनेमध्येबाट कृषितर्फ ६ हजार २ सय र उत्पादनमूलक क्षेत्रतर्फ ४ हजार कामदार उर्त्तीण हुने बुझिएको छ । कोरिया जानका लागि उत्पादनमूलक समूहमा २४ हजार ३८७ जनाले आवेदन दिएका छन् भने कृषि समूहमा ५१ हजार २२० जनको आवेदन परेको छ ।
