कोरियामा महाकवि जयन्तीमा अनेसासद्धारा दुई साहित्यकारलाई विशिष्ट सम्मान
सोल
अन्तराष्ट्रिय नेपाली साहित्य समाज (अनेसास) दक्षिण कोरियाले महाकवि लक्ष्मी प्रसाद देवकोटाको कृति र व्यक्तित्वको चर्चा साथै स्रस्टा सम्मान गरेको छ ।
१०८ औं देवकोटा जयन्तीको अवसरमा आइतबार गरिएको कार्यक्रममा साहित्यकार निर्मोही व्यास र कोरियन कवि किम ह्यङ ह्योलाई अनेसासले विशिष्ट सम्मान गरेको छ । २०१७ सालदेखि लेखन यात्रा थालेका व्यासले कविता–काव्य ,आख्यान, यात्रासाहित्य, संस्मरण, समालोचना गरी दर्जन बढी पुस्तकहरु प्रकाशित छन् । साथै उनका विभिन्नपत्रपत्रिकामा लेख, समालोचना, कविता, गीत, कथा, निबन्ध, संस्मरण र नियात्रा गरी ३०० बढी फुटकर रचनाहरू प्रकाशित छन् ।
कार्यक्रममा नेपाली नाम सगरमाथा गुरुङबाट परिचित कोरियन कवि किम ह्यङ ह्योलाई विशिष्ट सम्मान गरिएको थियो । कवि किमका नेपाली भाषामा अनुवादित “आकाशे समुन्द्रको गीत” नामक कविता संग्रह प्रकाशित छन भने बाल कथाका तीन पुस्तक प्रकाशित छन् । जसमा “मुना मदनको आकाश “नेपाली, अंग्रेजी र कोरियन भाषामा प्रकाशित छन भने “बाटो हिँड्ने बटुवाहरु ” नेपाली र अंग्रेजी भाषामा त्यस्तै “खुशी मानिस” बाल कथा नेपाली र कोरियन भाषामा प्रकाशित छन् । उनले महाकवि देवकोटाको “यात्री ” र “वन” कविता कोरियन भाषामा अनुवाद गरि प्रकाशित गरेका छन ।
रचनाकार सुर्य खत्री घायल पनि सम्मानित भएको कार्यक्रममा साहित्यकर्मीहरुले महाकविको कृति स्मरण तथा उनका लेखन शैलीबारे चर्चा गरे । साहित्य अनुरागीहरुको जमघट भएको कार्यक्रममा अन्तराष्ट्रिय नेपाली साहित्य समाज दक्षिण कोरियाका महासचिव प्रमोद सारंगले देवकोटाको लेखाईको धाराप्रवाह विशिष्ट रहेको बताए । अर्का साहित्यकर्मी बलदेव भट्टराईले साहित्यमा झ्याउरे लय र स्वच्छन्दतावादी धार देवकोटाले भित्राएको स्मरण गरे ।
कार्यक्रममा प्रमोद सारंग, कोरियन कवि किम ह्यङ ह्यो, बलदेव भट्टराई ,सुर्य खत्री घायल,गंगा बस्नेत अमृत गिरि र बिनोद साबुदले आफ्ना रचना बाचन गरे । गजलकार जितेन्द्र बानियाको गुरासहरु बिदेशिए उन्यु फुलेकोछ बानेश्वरमा , राज्य चाहनेहरु लिन जाउ पसल खुलेको छ बानेश्वरमा गजलले धेरैको ध्यान खिचेको थियो ।
