नेपाल र आयरल्यान्ड अन्डर नाइन्टिन विश्वकपमा भिड्दै
सोल -बंगलादेशमा जारी आइसीसी यु–१९ विश्वकप क्रिकेटमा शनिबार नेपाल र आयरल्यान्ड भिड्दै छन् ।
नेपाली समयअनुसार बिहान पौने ९ बजेदेखि सुरु हुने खेल जित्न सके नेपालको क्वार्टरफाइनल यात्रा सहज हुनेछ ।
समूह ‘डी’मा रहेको नेपालले पहिलो खेलमा न्यूजिल्यान्डलाई ३२ रनले हराउँदै क्वार्टरफाइनलका लागि बलियो दाबेदारी प्रस्तुत गरेको हो । सोही समूहको अर्को खेलमा भारतले आयरल्यान्डलाई हराएको थियो ।
शनिबार नेपालले आयरल्यान्डलाई र भारतले न्यूजिल्यान्डलाई हराउन सके समूहको अन्तिम खेल खेल्नुअगावै नेपाल र भारत क्वार्टरफाइनलमा पुग्ने छन् ।
समूहको अन्तिम खेलमा सोमबार नेपाल र भारत खेल्ने कार्यक्रम छ ।
नेपालले छनोट प्रतियोगितामा आयरल्यान्डलाई नै पराजित गर्दै विश्वकपमा स्थान सुरक्षित गरेकाले नेपाल शनिबारको खेलमा पनि हावी हुने अनुमान गरिएको छ ।न्यूजिल्यान्डलाई हराएसँगै नेपालको मनोबल बढेको छ ।
