प्रेम प्राकृतिक कुरा हो – गायिका श्रेयसी चेम्जोङ

धनकुटा जिल्लाको बसन्तटार – ४ मा आमा माङरोती चेम्जोङ र बुवा तसार सिं चेम्जोङको कोखवाट २०५५ सालमा जन्मेकी गायिका श्रेयसी चेम्जोङ युवा पुस्ताकी चर्चित गायिका हुन् | २०६३ सालमा रेडियो नेपालबाट स्वर परिक्षा पास गरेकी चेम्जोङले ” विधाताले दिएको मानिसको हाम्रो जिन्दगी” बोलको गीत रेकर्ड गरेर सांगीतिक दुनियामा पाईला चालेकी हुन् | २०७१ सालमा पाँचौँ विन्द्यवासिनी म्युजिक अवार्ड अन्तर्गत ‘सर्वोत्कृष्ट गायिका सुगम संगीत अवार्ड ,२०७० सालमा चौथो विन्दवासिनी म्यूजिक अवार्ड अन्तर्गत ‘वर्षको सर्वोत्कृष्ट नवप्रतिभा’ अवार्ड , २०७० मा धनकुटा प्रतिभा पुरस्कार नगद रु. १५,००० सहित दर्जनौ पुरस्कार र सम्मान पत्रवाट पुरस्कृत भईसकेकी छिन | आधा दर्जन एकल साझ र दर्जन भन्दा बदि युगल साझ गरिसकेकी चेम्जोङले आधा दर्जन नेपाली चलचित्रमा पनि स्वर दिइसकेकी छिन | बर्तमान नेपाली संगीत बजारको अवस्था कस्तो छ त यसैको सेरोफेरोमा रहेर फोनिजकोरिया संवाददाता निश्चल काउचाले चेम्जोङसंग गरेको कुराकानी :-

 

 

संगीतमा लाग्ने प्रेरणा कोबाट पाउनु भो ?

मैंले ६ वर्षको उमेरदेखि नै गीत गाउन थालेकी हुँ । मलाई गीत, संगीतमा लाग्ने प्रेरणा दिनुहुने मेरी फूपुको छोरा दाजु पूर्णचन्द्र जबेगुबाट पाएकी हुँ । वहाँले मलाई बोकेर ठाउँठाउँमा गीत गाउन लानुहुन्थ्यो । मेरो स्वर राम्रो छ भनेर प्रचार गरिदिनुहुन्थ्यो । वहाँ मेरो साँगीतिक जीवनको आधार हुनुहुन्छ । वहाँले त्यसो नगरिदिनुभएको भए शायद म अहिले यसरी गायिकाको रुपमा परिचय दिन लायक हुन्नथेँ होला । वहाँप्रति म सधैँ आदर गर्दछु ।

यति सानै उमेरमा यति ठूलो सफलता पाउनुभएको छ । यसको श्रेय कसलाई दिनुहुन्छ ?

 

यो सफलताको श्रेय मेरो अभिभावक/मामा श्री भानेन्द्र सम्बाहाङफे ‘जुझारु’ लाई जान्छ । वहाँ मेरो कर्मदाता पनि हुनुहुन्छ । म त उमेरको हिसाबले सपना जस्तो गरी गीत गाउदै आएकी छु । सारा कुराको बन्दोबस्त मेरो मामाले नै गरिदिनुहुन्छ । मेरो काम पाएको गीत राम्रोसँग गाइदिने मात्र हो । मैंले आजसम्म जुन मान, सम्मान र सफलता पाएकी छु मामाकै साथले सम्भव भएको हो ।

 

 

समग्रमा नेपाली संगीतको अवस्था कस्तो छ ?

 

पहिलेका अग्रज गायक, गायिका जति पनि हुनुहुन्थ्यो वहाँहरुको समयमा गीत, संगीतको माहोल त थियो तर गीत, संगीतमै लागेर बाँच्नसक्ने अवस्था थिएन । त्यो हेरी त अहिलेको गीत, संगीतको र त्यसमा लाग्ने कलाकारहरुको अवस्था राम्रो छ । पहिलाभन्दा अहिले गीत, संगीतमा रुची राख्ने श्रोताहरुको संख्या बढेको पाइन्छ ।

 

सुगम संगीतको बजार पछिल्लो चरणमा खस्केको छ भन्छन् नि ?

 

मलाई त्यस्तो लाग्दैन किनभने पहिलाको भन्दा अहिले सुगम संगीतका श्रोताहरुको संख्या धेरै छ । कुशल गायक, गायिकाहरु पनि बजारमा धेरै आएका छन् । गीत गायनको स्तर र आधुनिक प्रविधिबाट रेकर्ड भएका गीतहरु बजारमा प्रशस्त मात्रामा पाइन्छन् । सञ्चार माध्यमको पहुँच पनि बढेको छ । प्रसस्तै रेडियो, एफ. एम. अनि टेलिभिजनहरु छन् । पहिलेको भन्दा अहिले गीत धेरै श्रोताहरुको सामु पुग्न सकेको अवस्था छ । हजारौँ गीतकार, संगीतकार, गायक, गायिका, वाद्यवादकहरु, रेकर्डिङ स्टुडियोहरु राम्रैसँग रोजीरोटीको व्यवस्था गर्न सकेको अवस्था छ । सुगम संगीतका गीतहरु नै कालजयी बनेका छन् । त्यसैले सुगम संगीतको बजार खस्किनुको सट्टा बढेको चाहिँ हो भन्न सकिन्छ ।

 

चर्चित गायिका पर्नुभो । प्रेम प्रस्ताव राख्नेहरु पनि होलान् नि ?

 

प्रेम प्राकृतिक कुरा हो तर कुन समयमा प्रेम गर्नु उचित हुन्छ भन्ने कुराको ठूलो महत्व हुन्छ । त्यसैले मेरो अहिले नै प्रेम प्रस्ताव पट्टी ध्यान दिने अवस्था आएको छैन ।

 

संगीत क्षेत्रमा पनि नातावाद र कृपावाद चल्छ भनिन्छ नि ?

 

तपाईको यो प्रश्नबाट म अत्यन्तै खुशी छु किनभने योभन्दा पहिले यस्तो प्रश्न कसैले पनि सोधेको थिएन तर सोधुन् भन्ने मलाई लाग्थ्यो । हो, मैँले देखेको र भोगेको पनि छु । नेपालमा अरु क्षेत्रमा नातावाद र कृपावाद भएजस्तै संगीतको क्षेत्रमा पनि नातावाद र कृपावाद झनै हावी छ । यसैको कारण राम्रा कला र गला भएका प्रतिभाहरु ओझेलमा छन् तर पहुँच भएकाहरु जसको कला र गला उति स्तरीय नभए पनि रातदिन सञ्चार माध्यमहरुमा छाइरहेका हुन्छन् । राम्राराम्रा अवार्ड र सम्मान अनि अवसर पनि तिनैले पाइरहेका हुन्छन् । यस्तो चलनलाई हटाउनै पर्छ ।

 

भावी योजनाहरु के के छन् ?

 

म अहिले बिद्यार्थी भएको हुनाले पढाइमा नै विशेष समय दिनेछु । आगामी वर्ष लोक, आधुनिक, पप, लिम्बू भाषामा एकल एल्बम् निकाल्ने सोचमा छु र तयारी पनि थालेकी छु ।

 

राम्री पनि हुनुहुन्छ मोडेलमा अफर आयोभने अभिनयमा पनि जम्ने विचार छ कि ?

 

धेरै धेरै धन्यबाद म जस्तीलाई राम्री देख्नु भएकोमा । अरुको म्युजिक भिडियोमा होइन आफ्ना गीतका म्युजिक भिडियोहरुमा चाहिँ अभिनय गर्नु पर्ला कि जस्तो लागिरहेको छ र अरुले पनि तिमी आफैँले आफ्ना गीतहरुमा अभिनय गर्दा राम्रो हुन्छ भनेर सल्लाह दिनुभएको छ ।

 

 

सानै उमेरदेखि गायनमा लाग्नुभो । पढाइलाई त बाधा पुग्यो होला नि ?

 

एकदमै सही कुरा हो । जति मेरा साथीहरुले पढाइलाई समय दिन्छन् । त्यति म दिन सक्दिन तर म सक्दो मेहनत गर्दैछु ।

 

 

प्राय! सेन्टिमेन्टल गीत गाउनु हुन्छ । स्वरले त्यस्तै गीतलाई म्याच गरेर हो कि ?

 

सबै खालका गीतहरु गाउँछु । रोमान्टिक गीतहरु पनि धेरै गाएको छु र गाउँदैछु । मेरो स्वरमा धेरै संगीतकार तथा गीतकारज्यूहरुले सेन्टिमेन्टल गीतहरु रेकर्ड गर्न चाहनु हुन्छ र धेरैजसो सेन्टिमेन्टल गीतहरु सबैले मनपराइदिनु भएको छ । तुलनात्मक रुपमा सेन्टिमेन्टल गीतहरु चलेका छन् ।

 

अन्त्यमा केही भन्न चाहनु हुन्छ कि ?

 

विश्वभरीका मेरा श्रोताहरुमाझ आफ्ना कुराहरु राख्न अवसर दिनुभएकोमा फोनिजकोरियालाई विशेष धन्यबाद दिन चाहन्छु । यसका साथै स्वदेश तथा विदेशमा रहनुहुने सम्पूर्ण मलाई माया गर्ने आदरणीय फ्यानहरुप्रति आभारी छु र आउने दिनहरुमा पनि मेरा गीतहरु सुनेर मलाई माया गरिदिनु होला भनी हार्दिक अनुरोध गर्दछु ।