कोरियामा ‘अन्तर्राष्ट्रिय मातृभाषा उत्सव-२०२४’ सप्ताहव्यापी मनाउने
अन्तर्राष्ट्रिय मातृभाषा दिवस २०२४ को अवसरमा दक्षिण कोरियामा सप्ताहव्यापी विभिन्न कार्यक्रम गरी मनाउने भएको छ । नेपाल आदिवासी जनजाति साहित्यकार लेखक महासङ्घ, दक्षिण कोरियाको आयोजनामा फेब्रुअरी १९ देखि २५ तारिख सम्म विभिन्न विधाका कार्यक्रम गरी मनाउने भएको हो ।
‘अन्तर्राष्ट्रिय मातृभाषा उत्सव—२०२४’ नाम राखेर सप्ताहव्यापी कार्यक्रमको तालिका आयोजकले सार्वजनिक गरेको छ । सोमबारदेखि शनिवारसम्म (फेब्रुअरी १९—२५) सम्म जुम माध्यबाट अनलाइनमार्फत सेसन सञ्चालन गर्ने र आइतबार भौतिक रूपमा उपस्थितिमा अन्तिम सेसनबाट समापन गर्ने कार्यक्रम रहेको छ । ‘मातृभाषाको मृत्यु, पाठ्यक्रममा मातृभाषा, आदिवासी मुद्दा, भुईमान्छेको आवाज, भाषा आन्दोलन र नयाँ पुस्ता’ विषयहरूमा विमर्श गर्ने छन् । ‘कवितामा मातृभाषाका स्वरहरू’ (वाचन), ‘नेपालमा मातृभाषा साहित्यको अवस्था: अवसर र चुनौतीहरू’ (विचार), कुसुण्डाको अलग संसार (कार्यपत्र) र माझीको भाषिक सांस्कृतिक अवस्था (कार्यपत्र) प्रस्तुत हुने तालिकामा रहेका छन् ।
संस्थाले स्थापनाकाल देखि नै मातृभाषाको संवर्द्धन, उन्नयन साथै आदिवासी जनजातिका मुद्दाहरु माथी बिभिन्न कार्यक्रमहरु गर्दै आइरहेको छ । सन् २००० मा संयुक्त राष्ट्र सङ्घले फेब्रुअरी २१ मा अन्तर्राष्ट्रिय मातृभाषा दिवसको मान्यता दिएपछि यस दिनलाई दिवसको रूपमा मनाउँदै आइरहेको छ ।
