नेपाली जनसम्पर्क समिति नर्वेले वि पी स्मृति दिवस मनायो
केशब पुरी ,नर्वे -नेपाली जनसम्पर्क समिति नर्वेले ३३ औं वी पी स्मृति दिवसको दिन अन्तरक्रिया तथा प्रस्तावित नेपालको संबिधान २०७२ मा सुझाब संकलन गरी मनाएको छ ।
बुधबार नर्वेको राजधानी ओस्लो स्थित लोरेनमा आयोजित सो कार्यक्रममा उपस्थित रहेका नेपालीहरुले स्व. विश्वेश्वरप्रसाद कोइरालालाइै नेपालका प्रथम जननिर्वाचित प्रधानमन्त्री, जननायक तथा नेपाली साहित्यका एक मुर्धन्य व्यक्तित्वका रुपमा चित्रण गरि हार्दिक श्रद्धा सुमन व्यक्त गरेका थिए।
प्रस्तावित नेपालको संबिधान २०७२ मा नेपाली जनसम्पर्क समिति नर्वेका पदाधिकारी, सदस्य, सल्लाहकार र कार्यक्रममा उपस्थित बुद्धिजीवीहरुले धार्मिक स्वतन्त्रता सहितको हिन्दु राष्ट्र हुनुपर्ने, प्रत्यक्ष निर्वाचित प्रधानमन्त्री हुनु पर्नेमा जोड दिएका छन् ।
साथैं वडाध्यक्षको व्यवस्था हुनुपर्ने, समानुपातिक व्यवस्था पूर्णरुपमा खारेज हुनुपर्ने, एउटा व्यक्ति दुर्इ कार्यकाल भन्दा बढी प्रधानमन्त्री हुन नपाइने, केन्द्रिय सरकारको नियन्त्रण रहने गरि नामांकन र सिमांकन सहितको संघियता आउनु पर्ने जसका नामांकन भौगोलिक र साँस्कृतिक महत्वका विषयलाई आधार बनाएर राखिनु पर्ने, आरक्षण जातका आधारमा नभई सामर्थ्यका आधारमा दिइनुपर्ने, मानवतस्कर, ज्यानमारा, बलात्कारी र भ्रष्टाचारीलाई आजीवन काराबासको सजाय हुनुपर्ने भनि कार्यक्रममा उपस्थित एवं सहभागी अधिकांशले नेपाली जनसम्पर्क समिति नर्वे मार्फत सुझाब दिएका छन्।
कोइरालाको योगदानको जति चर्चा र प्रशंशा गरेपनि कम हुने भन्दै वी पी ले देखाउनु भएको मार्गमा आजका नेपाली कांग्रेस र यसका नेताहरु सहि ढंगले हिड्न सकेमा उनीप्रतिको सच्चा श्रधान्जली यहि हुनेछ भनि कार्यक्रमका प्रमुख अतिथि शालिग्राम अर्याल, समितिका वरिष्ठ उपाध्यक्ष जितेन्द्र विक्रम शाही लगायतले आफ्ना भनाइहरु राखेका थिए।
कार्यक्रमको सभापतित्व र समापन समितिका अध्यक्ष जीवन बहादुर शाहीले गर्नु भएको थियो भने कार्यक्रमको संचालन वी पी स्मृति एवं अन्तरक्रिया कार्यक्रमका संयोजक तथा समितिका महामन्त्री केशव पुरीले गरेका थिए।
