दक्षिण कोरियामा कोरोनाले रोक्न सकेन राष्ट्रिय सभाको निर्वाचन, सन् २००० यताकै बढीले गरे मतदान
अहिले बिश्व नै कोरोना भाइरस(कोबिड-१९)को आतंकले थिलथिलो भएको छ । चिनको वुहानबाट सुरु भएको कोबिड-१९ ले विश्वकै महाशक्ति राष्ट्र मानिने अमेरिकालाई आछु आछु पारिरहेको छ । त्यस्तै अमेरिकन लगायत युरोपेली राष्ट्रहरुले सोच्दै नसोचेको मानवीय क्षति बेहोरेको छ । साथै अहिले दक्षिण एसियायी राष्ट्रहरुमा पनि फैलिने क्रम छ ।
केहि समय अगाडि सम्म दक्षिण कोरियामा पनि तीब्र गतिमा कोरोना संक्रमण फैलिएको थियो । तर अहिले करिब करिब नियन्त्रण उन्मुख छ । कुनै बेला दैनिक ५ सय देखि ९ सय भन्दा बढी सम्मको संक्रमित फेला परेको थियो । अहिले यो संख्या ३० जना बन्दा कममा झरेको अवस्था छ ।
यस्तैमा यहाँ राष्ट्रिय सभाको ४ बर्षे नियामित निर्वाचन अत्याधिक जनताको सहभागीतामा सम्पन्न भएको छ । निर्वाचन आयोगका अनुसार ६६ प्रतिशतले मतदान गरेको छ । यो सन् २००० यताकै उच्च मतदान हो । २०१६ को अघिल्लो निर्बाचनमा ५८ % मत मात्र खसेको थियो । कोरोनाकै कारण विभिन्न देशले आफ्नो नियमित निर्वाचन गर्न नसकिरहेको अवस्थामा यसरी कोरियामा भएको ऐतिहासिक निर्वाचनलाई अर्थपूर्ण मान्न सकिन्छ ।
देश भर १४ हजार ३ सय ३० स्थानमा भएको मतदानमा ३०० (प्रत्यक्ष २५३ र समानुपातिक ४७) जना राष्ट्रिय सभा सदस्य(सांसद)का लागि मतदान भएको हो ।
कसरी गरे निर्वाचन ?
कोरियामा मतदान हुदै गर्दा उच्च सतर्कताका साथ मतदान गर्ने व्यवस्ता गरेको थियो । सबैलाई अनिवार्य मास्क लगाउनु पर्ने थियो भने एक पटक मात्र पयोग गरेर फाल्ने प्लास्टिकको पन्जा मतदान स्थलमा नै उपलब्ध गराएको थियो । सबैको ज्वरो चेक गरेको थियो ।
मतदान स्थलमा थर्मल डिट्याक्सन डिवाइस द्वारा मतदाताको निगरानी पनि गरेको थियो । त्यस्तै प्रत्येक मतदाता कम्तीमा पनि १ मिटरको दूरीमा रहेर मतदान गर्न पाउने व्यवस्था गरेका थिए । सेल्फ क्वरेनटाएनमा भएका हरुले भने बिशेष बुथ मार्फत ६ बजे भन्दा पछाडी मतदान गर्ने व्यवस्था गरेको छ ।
यस अघि पुर्व मतदान गत शनिबार र आईतबार भएको थियो जसमा २६.६९% मत खसिसकेको थियो । कोबिड – १९ को रोकथामका लागि मुन्जे इन सरकारले पाएको सफलताले गर्दा सत्तारुढ डेमोक्रेटिक पार्टीले बहुमत ल्याउने आँकलन गरिएको छ ।
