अमेरिकामा टिपीएस खुल्यो, आवेदन डिसेम्बर २१ सम्म
फोनिज कोरिया संवाददाता
न्युयोर्क-अमेरिकी सरकारले कागजविहीन रहेका नेपालीहरुलाई ‘टेम्पोररी प्रोटेक्टेड स्ट्याटस(टिपिएस)’ प्रदान गर्ने भएको छ । अमेरिकी सरकारले आप्रवासीहरुलाई अध्यागमन सम्बन्धी अस्थायी संरक्षणको व्यवस्था दिने सुविधाअनुसार कागजविहीन नेपालीलाई यो सुविधा प्रदान गरेको हो ।
यो सुविधा पाउन नेपालीले आवेदन भर्नुपर्नेछ । अमेरिकी संघीय सुचना प्रवाह गर्ने ‘फेडेरल रजिस्टर’ले दिएको जानकारीअनुसार ‘होमल्यान्ड सेक्युरेटी विभाग’ले यो सुविधा पाउन जुन २४ देखि डिसेम्बर २५ सम्म आवेदन दिन सकिने छ । यसले अमेरिकामा कामकाजका लागि कानुनी कागज नभएका नेपालीहरुलाई मद्दत पुग्ने छ ।
टिपिएस प्राकृतिक विपत्ति, सैनिक विद्रोह जस्ता घटनामा अमेरिकामा रहेका सम्बन्धित मुलुकका नागरिकलाई प्रदान गरिने अस्थाई रुपमा संरक्षण गर्ने अमेरिकी नीति हो । नेपालमा गत वैशाख १२ गते भूकम्प गएको र यसले ठुलो क्षति गरेकोले अमेरिकामा कागजविहीन रुपमा बसेका नेपालीहरुलाई यो सुविधा प्रदान गराउन विभिन्न नेपाली संघसस्थाहरु लागि परेका थिए । फेडेरल रजिस्टरले नेपालमा भूकम्पले ठुलो क्षति पुगेको र नेपाल सरकारको अनुरोध आएकोले यो सुविधा प्रधान गरेको जनाएको छ । उसले २५ हजार नेपालीले यो सेवा लिन सक्ने अनुमान गरेको छ ।
आप्रवासन सम्बन्धी कानुन ‘पी एल १०१–६४९’ ले व्यवस्था गरेकोले अभियन्ताहरुले नेपालीले टिपिएस पाउनुपर्नेमा जोड दिएका थिए । नेपालमा आएको भूकम्पलाई मध्यनजर गर्दै गत वैशाख ३० मा अमेरिकाका लागि नेपालका राजदुत डा. अर्जुन कार्कीले ‘अमेरिकी डिपार्टमेन्ट अफ होमल्यान्ड सेक्युरिटी’का सेक्रेटरी जेह जोहन्सनलाई सम्बोधन गर्दै टिपीएस का लागि पत्राचार गरेका थिए । नेपाली डायस्पोरा एवं केहि अमेरिकी कंग्रेसम्यान र सिनेटरहरुले पनि यसको पक्षमा लबिङ गरेका थिए । जसमा न्युयोर्कबाट प्रतिनिधित्व गर्ने सिनेटर चाल्र्स सुमेर डटेर लागेका थिए ।
यो सुविधा यही जुन २४ तारिख बुधबारका दिनबाट सुरु भई आगामी वर्ष २०१६ डिसेम्बर २१ सम्म अर्थात् १८ महिनासम्म जारी रहने विभागले जनाएको छ । टिपीएसको अवधि सकेपछि भने सम्बन्धित सबै गैरकानुनी हैसियतमै फर्किनेछन् ।
१८ महिनाको लागी मात्र टिपिएस
कानुन व्यवसायी खगेन्द्र क्षेत्रीका अनुसार टिपिएस पाउने मुख्य प्रावधान कुनै पनि नेपाली वा नेपालमा बसेको गैरनेपाली यसै वर्षको जुनको २४ तारिख भित्रमा अमेरिका आइसकेको हुनुपर्छ । ति व्यक्तिहरुले जुनको २४ देखि डिसेम्बरको २१ सम्म टिपिएसको निवेदन दिन पाउने छ । उनीहरुले दिएको निवेदनको आधारमा सरकारले काम गर्नका लागी वर्कपरमिट र नेपालमा आफन्त भेटन जानका लागी ट्राभल डकुमेन्ट उपलब्ध गराउछ । तर यो टिपिएसको म्याद भने १८ महिनाको मात्र हुनेछ । १८ महिना पछि टिपिएसको म्याद सकेको लगतै यो काम लाग्दैन तर त्यतिखेर सरकारले कुनै योजना ल्याएको खण्डमा भने यसैबाट पनि ग्रिनकार्ड बनाउन मौका मिल्छ ।
