उत्तर कोरियालीहरुको रमाइलो

विश्व भरि क्रिसमस र नयाँ बर्षको रमाइलो छ । उत्तर कोरियामा पनि मानिसहरु सडकमा निस्किएर रमाइलो गरिरहेका छन् । मौसम माइनस १० डिग्री सेल्सियस भन्दा बढि छ । जता ततै हिउँ नै हिउँ छ । तर उनीहरुले न त क्रिसमस मनाउन लागेका हुन न त नयाँ बर्षकै तयारी ।
वास्तवमा उनीहरुले नेता किम जोङ उनकी हजुरआमा किम जङ सुकको १०० औँ जन्मतिथिको मौकामा मनाएको बताइएको छ ।
उत्तर कोरियामा क्रिसकमस मनाउनेलाई जेल सजाय तोकिएको छ जहाँ उनीहरु कडा यातनाको शिकार हुन सक्छन् । त्यसैकारणले पनि कसैले क्रिसमसको अवसरमा कुनै किसिमको उत्सव मनाउने गर्दैनन् । तरपनि शून्य डिग्री भन्दा कम तापमानका बेला चारैतिर हिउँले ढाकिएको सडकमा उत्तर कोरियाली नागरिकहरुले नाचगान गरेर जोङ सुकको जन्मतिथि भव्य तरिकाले मनाएका हुन् । किम जङ सुक सन् १९३० देखि कोरियाली स्वतन्त्रताको कार्यकर्ता र कम्युनिस्ट राजनीतिज्ञका रुपमा सक्रिय थिइन् ।

३१ वर्षकै उमेरमा उनको मृत्यु भइसकेको बताइएपनि त्यसको कारण भने अझै रहस्यमय भएको बताइएको छ । जापान विरुद्धको क्रान्तिमा पनि उनको ठूलो भूमिका रहेको बताइन्छ ।

यता देशमा थपिँदै गएका प्रतिबन्धले संकट बढाइरहँदा उच्च अधिकारीहरुले संयुक्त राष्ट्र संघको यस निर्णयले युद्ध निम्त्याएको भन्दै आक्रोस पोखिरहेका छन् ।
नागरिकहरु चाहिँ नाचगानमा रमाइरहेको देखिनु धेरैले अनौठो मानिरहेका छन् । शुक्रबारदेखि लागु गरिएको प्रतिबन्धले आगामी दिनहरुमा उत्तर कोरियाको जीवनशैलीमा धेरै समस्या उत्पन्न गराउने निश्चित छ । तर पनि उत्तर कोरियाली नागरिकहरु यसरी सडकमा नाचगान सहितको रमाइलो विशेष अबसरमा मात्र गर्ने गर्छन ।