प्रवासी भूमिबाट गीतकारको पहिचान बनाउदै मिलन किराती
![](https://www.fonijkorea.net/wp-content/uploads/2016/10/milankirati.jpg)
फोनिज कोरिया सम्वाददाता,
दक्षिण कोरियाः
‘निभि जाने आगो जस्तो चुडि जाने धागो जस्तो हैन मेरो माया
मौसम जस्तो बदली जाने नौनी जस्तो पग्ली जाने हैन मेरो माया…’ मिलन किरातीको शब्द, राजकुमार बगरको संगीत र अहिलेकी अत्यन्त चर्चित गायिका मेलिना राईको स्वर रहेको उक्त गीतले हालै सम्पन्न कालिका म्युजिक अवार्ड २०७३ मा उत्कृष्ठ संगीत अवार्ड पाउन सफल भएको छ । ‘निभि जाने आगो’ जस्तो बोलको उक्त गीत शब्द र संगीत दुई विधामा नोमिनेसनमा परेको थियो ।
‘मेरो गीत मोफसलको सबैभन्दा ठुलो र प्रतिष्ठित कालिका म्युजिक अवार्डमा नोमिनेसनमा पर्नु नै ठुलो कुरा थियो । अझ संगीत विधामा अवार्ड नै पाउदा झनै खुशी लाग्यो’, गीतकार किराती आफ्नो गीतको सफलतामा खुशी व्यक्त गर्छन् ।
पछिल्लो समय गीतकारको रुपमा आफुलाई परिचित गराइसकेका मिलन किरातीको केही गीतहरु राजकुमार बगर, डिआर अटुको संगीतमा प्रमोद खरेल, मेलिना राई, सागरसंसार राईलगायतका गायकगायिकाहरुले गाएका छन् ।
हाल दक्षिण कोरियामा कार्यरत मिलन किराती कामको ब्यस्तताले गर्दा पनि साहित्य लेखनमा धेरै समय दिन सकिरहेका छैनन् । उनलाई कोठामा बसेर साहित्य फुर्दैन । बाहिरी वातावरणले नै छुनुपर्छ । जसरी हावा हूरी चल्दा पात खसे झैं जब मनमा केही कुराले छुन्छ अनि उथलपुथल हुन्छ तब मात्र उनी लेख्न बस्छन् ।
त्यसो त उनको पारिवारिक वातावरण नै साहित्यमय थियो । बुबा जसराज किराती पनि नाम चलेका साहित्यकार नै हुन् । दाई दिदी सबैजना साहित्यमा रुचि राख्ने । तर मिलन भने साहित्यमा त्यति चासो राख्दैन थिए । जब परदेश लागे, प्रवासी भूमिको दुःख संघर्ष अनि अनुभूतिलाई साहित्यमार्फत् पोख्न थाले । ‘विदेश आएपछि सुरुका दिनहरुमा मनमा धेरै आँधीहूरी चल्थे त्यहि उथलपुथल भावनालाई गीत र कवितामार्फत् पोख्न थालें । सायद विदेश नआएको भए लेख्दिन पनि थिएँ होला’, उनी भन्छन् । उनका अप्रकाशित दर्जनौं गीत, कविताहरु डायरीको पानामा मात्र सिमित भएका छन् । भन्छन् ‘मलाई लेख्नसाथ आफ्नो सिर्जना बाहिर पोख्न मन लाग्दैन ।’ पहिला कविता लेखे पनि पछिल्लो समय गीत लेखन बढी रुचाउने मिलन भविष्यमा साहित्य लेखनलाई निरन्तरता दिनेमा विश्वस्त छन् ।
खोटाङको बुइपामा जन्मेका मिलन खोटाङबाटै प्लस टु सम्मको अध्ययन सकेर केही समय शिक्षण पेशा गरे । त्यसपछि व्याचरल अध्ययन गर्दागर्दै वैदेशिक रोजगारीको शिलशिलामा दक्षिण कोरिया आएका उनले नेपाल फर्केपछि नेपाली साहित्य लेखनसँगै कोरियामा सिकेको ज्ञान सिपलाई आफ्नै भूमिमा प्रयोग गर्ने लक्ष्य लिएका छन् । भन्छन्, ‘हामी युवाहरु विदेशमा सिकेको कुरालाई आफ्नो देशमा फर्केर सहि उपयोग गर्ने वातावारणको सिर्जना गर्नतिर लाग्नुपर्छ ।’