अब देखि (सिविटी) परीक्षामा कार्यक्षेत्रसँग सम्बन्धित प्रश्न पनि सोधिने
सोल – विशेष कोरियन भाषा (सिविटी) परीक्षामा अबदेखि कार्यक्षेत्रसँग सम्बन्धित प्रश्न पनि सोधिने भएको छ । यसअघिका परीक्षामा भाषिक क्षमताको मात्रै मूल्याङ्कन गरिँदै आएकोमा यसपटक देखि कार्यक्षेत्रसँग सम्बन्धित प्रश्न पनि सोधिने एचआरडी कोरिया इपिएस सेन्टर नेपालले जनाएको छ ।
सुनाई परीक्षा भने यथावत रहनेछ । कार्यक्षेत्रसँग सम्बन्धित क्षमता भएका कामदार छनौट गर्दा कार्यस्थलमा घुलमिल गर्न सजिलो हुने र रोजगारदातालाई पनि फाइदा पुग्ने सेन्टरका निर्देशक ली दोङ सिर्कले बताउनुभयो ।
यस अघिका परीक्षाहरुमा पढाई र सुनाई गरी पचास वटा प्रश्न सोधिन्थ्यो । अब भने कार्यक्षेत्र सम्बन्धित दशसहित पचास वटा प्रश्न सोधिनेछ ।
चौंथो परीक्षा डिसेम्बर २ देखि
चौंथो त्रैमासिक विशेष कोरियन भाषा परीक्षा आउँदो डिसेम्बर २ देखि काठमाडौंमा हुने भएको छ । त्यसका लागि नोभेम्बर १ देखि ३ सम्म परीक्षार्थीले आवेदन दिन सक्नेछन । यस पटकको परीक्षामा कम्प्यूटरमा दक्ष नभएका परीक्षार्थीलाई उत्तर सच्याउने सुविधा पनि दिइने सेन्टरले जनाएको छ ।
