एनआरएन ठालु संस्था हो भन्ने मान्यता उन्मुलन गर्छु-कार्की
सोल-प्रबासी नेपालीहरुको साझा संस्थाका रुपमा परिचित गैह्र आवासिय नेपाली संघ दक्षिण कोरिया शाखाको आगामी सेप्टेम्बर ६ तारिख आईतवारका दिन हुन गैरहेको पाँचौ अधिबेशनका लागि अध्यक्ष पदका लागि रोजगार प्रक्रिया प्रणाली मार्फत कोरियामा आई मजदुरी गरिरहेका नेपाल पत्रकार महासंघ कोरिया शाखाका भूपू अध्यक्ष खेम कार्कीले उम्मेदबारी घोषणा गरेका छन ।
उनले कोरियामा रहेका मजदुरहरु पक्षबाट आफूले उम्मेदवारी दिएको बताउदै एनआरएन कोरियालाई मजदुर मैत्री बनाउने बताएका छन । दक्षिण कोरियामा एनआरएन सदस्य हुन दुई वर्ष लाग्ने र १ वर्ष सदस्य भएको व्यक्ति मात्र पदाधिकारीमा उठने व्यवस्था मजदुरको हितमा नभएकोले यसलाई यही पटक विधानमा सच्चाउन पहल गर्ने कार्कीले बताएका छन ।
कोरियामा पत्रकारीताको मार्फतबाट कोरियामा संघ संस्थामा हुने गरेको आर्थिक अनियमितता ,गलत प्रवृतिलाई सच्चाउन पहल गरिरहेका कार्की एनआरएनलाई कोरियामा रहेका नेपालीको विश्वसनिय र पारदर्शी आर्थिक कारोबार गर्ने संस्थाको रुपमा विकास गर्ने बताएका छन ।
कोरियामा रहेका बत्तीसहजार नेपालीलाई एउटै छातामा ल्याउँने,एनआरएन धनीमानी र ठालुहरुको मात्र संस्थाहो भन्ने मान्यतालाई उन्मुलन गर्ने,कोरियामा रहेका नेपाली मजदुर के कस्ता समस्यामा रहेका छन ति समस्या निराकरणको लागी सरकारसँग पहल गर्ने लगायत मजदुर मजदुरकै लागि भन्ने मान्यतामा आफु मैदानमा उत्रीएको खेम कार्कीले बताएका छन ।
अन्य मुलुकमा पनि अधिबेशनको रौनक बढेसँगै दक्षिण कोरियामा पनि खेम कार्कीको उम्मेदबारी पश्चात यज्ञराज सुबेदी,रबिन तामाङ,राजु क्षेत्री,ध्यान राई,लोचन राई अध्यक्षका प्रत्यासी रहेका छन । कोरियामा पहिलो पटक ईपिएस मजदुरको रुपमा एनआरएनमा कार्कीको उम्मेदवारीलाई महत्वको साथ हेरिएको छ । उनले आफूले आफ्नो विस्तृत कार्ययोजना चाडै सार्वजनिक गर्ने र कोरियामा सबैको साझा एनआरएन बनाउन आफूले अध्यक्ष पदमा उम्मेदवारी दिएको बताएका छन ।
