मकवानपुरमा आदिवासी दिवस भव्य रुपमा मनाईने
अशोक सुजन श्रेष्ठ
हेटौडा -२१ औा विश्व आदिवासी दिवसका मकवानपुरमा बिबिध कार्यक्रमगरि भव्यताका साथ मनाईने भएको छ । नेपाल आदिवासी जनजाती महासंघ (नेफिन) मकवानपुरको बिहीबार हेटौडामा बसेको बिस्तारित बैठकले यस्तो निर्णय गरेको हो ।
महासंघका जिल्ला अध्यक्ष तिर्थबहादुर थापा मगरको अध्यक्षतामा बसेको बैठकले बृहत र्याली, अन्तरक्रिया लगाएतका कार्यक्रम गर्ने निर्णय गरेको छ । दिवसमा जातीय भेषभुषामा प्लेकार्ड, झाकीसहितको बृहत र्याली निकालिने नेपाल आदिवासी जनजाती महासंघ मकवानपुरका सहसचिब जंगबहादुर गुरुङ्गले जानकारी दिए । हेटौडा–२ मा रहेको महासंघको कार्यालय परिसरबाट शुरु हुने ऱ्याली हेटौडा बजारको परिक्रमा गरि पल्पसा सभागृहमा पुगी कोण सभामा परिणत हुनेछ ।
यही आईतबार (साउन २४ गते) अर्थात् अगष्ट ९ मनाईने दिवसमा बिबिध सास्कृतिक कार्यक्रमगरि कला, भाषा र संस्कृतीको प्रबर्द्धन समेत गरिने बताईएको छ । कार्यक्रममै नया संबिधानमा समानुपातिक समावेशी अधिकारको सुनिश्चितता बिषयक अन्तरक्रिया समेत गरिने सहसचिब गुरुङले जानकारी दिए । कार्यक्रममा आदिवासी अगुवाहरु र सरोकारवालाको सहभागिता रहने उनको भनाई छ ।
दिवसको यसबर्ष मुल नारा ‘पहिचान सहितको संघीयता आदिवासी जनजातिको अडान ! धर्म निरपेक्षता, समानुपातिक समावेशी सहितको नया संबिधान ’ भन्ने रहेको छ । आदिवासी जनजातिमाथि राज्यबाट नियोजित तरिकाले गरिरहेको भाषिक, सास्कृतिक, धार्मिक, राजनीतिक विभेद तथा मानव अधिकार हनन् लगाएत उत्पीडनबाट मुक्ती दिलाउन संयुक्त राष्ट्र संघले घोषणा गरेको विश्व आदिवासी दिवसलाई अधिकार प्राप्ती गर्ने आन्दोलनको रुपमा मनाईने गरिएको छ । नेपाल पक्ष राष्ट्र भएर अनुमोदन तथा प्रतिबद्धता जाहेर गरे अनुरुप कार्यान्वयनको प्रक्रिया अघि नबढेकोप्रति आदिवासी जनजाति महासंघले गम्भीर खेद प्रकट गर्दै आएको छ । अन्तरिम संविधान, पहिलो संविधान सभा तथा दोश्रो संविधान सभाको पहिलो बैठकले गरेका सहमति, सम्झौता र स्वामित्व ग्रहण गरेका पहिचानसहितको संघीयता समानुपातिक समावेशी, धर्म निरपेक्षता, आदिवासी जनजाति संवैधानिक आयोग, आदिवासी जनजातिहरुको अधिकार मौलिक हकमा सुनिश्चितता गरी संविधान जारी गर्न महासंघले माग गर्दै आएको छ ।
बैठकमा आदिवासी जनजाती महासंघ मकवानपुरका निवर्तमान अध्यक्ष बुद्ध लामा, सल्लाहकार मधुकर सिह थापा मगर, नेपाल तामाङ घेदुङका जिल्ला अध्यक्ष लिलाकुमार घलान, नेपाल मगर संघका केन्द्रिय सदस्य बिश्व आले मगर, नेपाल भाषा खल: मकवानपुरका उपाध्यक्ष नन्दरत्न स्थापित लगाएतले दिवसलाई सशक्त रुपमा मनाईनुपर्नेमा जोड दिएका थिए । कार्यक्रममा जनजाती महासंघ मकवानपुरका कोषाध्यक्ष खेम चेपाङ, सदस्य बद्रीबहादुर माझी, जिल्ला अध्यक्षहरु किरात राई यायोख्याका केबी राई, मगर संघका दुधराज थापा मगर, थारु कल्याणकारिणी सभाका हरिलाल चौधरी तथा नेपाल माझी उत्थान समाजका जिल्ला सचिव कञ्चन माझी, नेपाल मगर युवा संघका केन्द्रिय अध्यक्ष अशोक सारु मगर, नेपाल आदिवासी जनजाती पत्रकार महासंघ (फोनिज)का मध्यमाञ्चल संयोजक कुमार नेगी, केन्द्रिय पार्षद सुरेश श्रेष्ठ, जिल्ला अध्यक्ष पुर्णिमा गोले लगाएतको आतिथ्य रहेको थियो ।
