NRNA कोरियाको निर्वाचन सम्बन्धि पत्रकार सम्मेलन सम्पन्न

गैर आवासिय नेपाली संघ दक्षिण कोरियाको दशौँ अधिवेशनको निर्वाचन सम्बन्धि पत्रकार सम्मेलन सम्पन्न भएको छ। वुद्धि गुरुङ नेतृत्वको ए आर एनको आगामी सात हुने निर्वाचनको बारेमा दोङ्देमुन स्थित रोयल इन्डियाको हलमा पत्रकार सम्मेलन गरेको थियो। सम्मेलनलाई सम्बोधन गर्दै निर्वाचन मण्डलका संयोजक लोचन राईले उमेद्वारी प्रकिया, उमेद्द्वारी माथी दावि विरोध र निर्वाचन प्रकियाको प्राविधिक सुरक्षा सम्बन्धि जानकारी गराएका थिए। साथै उनले आर्थिक प्रतिवेदन पास भए मात्र निर्वाचन प्रकृया अगाडी बढ्ने बताएका थिए।

निर्वाचनमा अनलाइन मार्फत सहभागिता हुन सकिने छ। जसको लागि पञ्जिकृत सदस्यको इमेल, म्यासेज व काकाओ टकमा लिङ्क आउने छ उक्त लिङ्कमा गएर आफ्नो फोन नम्बर भेरिफाइ गरेपछि कोड प्राप्त हुने छ र उक्त कोड लगाएपछि मात्र उमेद्वारको नामावली देखिने छ्। एउटा मोबाइलबाट एक मत मात्र दिन सकिने समितिले जनाएको छ। नतिजा प्रकाशन जुलाई २७ कै दिन निर्वाचन पश्चात प्रकाशित गरिने पनि जनाइएको छ।

आज राति १२ बजे सम्म उमेद्वारी दर्ता गर्न सकिने र भोली दिउँसो १२ बजे उमेद्वारी नामावली प्रकाशन गरिने उनले बताए। साथै जुलाई २२ तारिख दिनको १२ बजेसम्म उमेद्वारी नामावली उपर दावि विरोध गर्न सकिने र २३ तारिख दिउँसो १२ बजे नामावली उपर छानबिन र उमेद्वारी नामावली पुन : प्रकाशन गरिने पनि उनले जानकारी गराए। २४ तारिख १२ बजेसम्म उमेद्वारी मनोनयन पत्र फिर्ता लिन सकिने छ भने दिउँसो २ बजे अन्तिम नामावली प्रकाशन हुने निर्वाचन मण्डलले जनाएको छ।

निर्वाचन समितिमा सदस्य डा . कमला केसीले उमेद्वारी योग्यताको नियमावली वाचन गरेर जानकारी गराएकी थिइन्। साथै उनले उमेद्वारी दर्ता गर्दै गर्दा नियम स्पष्ट बुझेर दर्ता प्रकृया अगाडी बढाउन अनुरोध गरेकी थिइन्। यस्तै समितिका अर्का सदस्य डा . बाबु काजी श्रेष्ठले निर्वाचन प्रक्रिया निष्पक्ष हुने आस्वशन दिँदै निर्वाचनमा सहभागिता जनाउन आग्रह गरेका थिए।