कोरियाबाट नेपाल फर्केका मध्ये फेरी आउन चाहनेको संख्या अत्यन्त न्यून
सोल-रोजगार अनुमति प्रणाली (ईपीएस) को कार्यअवधि पूरा गरेर कोरियाबाट फर्केका नेपाली कामदार मध्ये पुन कोरिया आउन चाहनेको संख्या अत्यन्त न्यून रहेको छ |
बैदेशिक रोजगार बिभागले गरेको सर्भेक्षण अध्ययन अनुसार यहाँबाट फर्केका नेपाली कामदार मध्ये पुन: कोरिया आउन चाहने ०.५२ प्रतिशत रहेको छ | बिभिन्न मितिमा कोरिया आएर गत असार १८ गतेसम्म नेपाल फर्केका ९ सय ५० जना कामदारहरुलाई ‘नेपाल सरकारसंग के कस्तो अपेक्षा गर्नुहुन्छ ?’ भन्ने प्रश्नमा ५ जनाले मात्र पुन कोरिया आउने इच्छा ब्यक्त गरेका हुन् |
उनीहरुमध्ये ६ सय ८९ अर्थात ७२.५२ प्रतिशतले सहुलियत ऋण र सीप बिकासको तालिम माग गरेका छन् । त्यस्तै छोराछोरीलाई सहज ढंगले पढाउन पाउन १.२६ प्रतिशतले माग राखेका छन् भने देशमा सुशासन कायम होस् भनेर माग गर्नेमा ०.४२ प्रतिशत रहेका छन् । ९ सय ५० मध्ये ४९ जना महिला कामदार थिए ।
१५ जिल्लालाई मुख्य आधार मानेर गरिएको सर्भेक्षणमा गत असार १८ गते सम्ममा स्वदेश फर्केका कामदारलाई समेटिएको छ । अंकुर नेपालले तयार गरेको सो प्रतिबेदनमा कामदारसँग प्रश्नावली बनाएर प्रत्यक्ष भेटेर, छापा तथा बिद्युतीय संचार माध्यम र सामाजिक संजालबाट सुझाव संकलन गरिएको थियो ।
जिल्लाका आधारमा रुपन्देहीका सबैभन्दा धेरै १ सय ५० कामदार कोरियाबाट फर्केको सर्भेक्षणमा उल्लेख छ । यी मध्ये ७ जना महिला छन् । त्यसपछि म्याग्दीका ७९, सुनसरीका ६५ कास्कीका ६५, चितवन ५३ , काठमाडौंका ५०, पार्वातका ४४, गोरखाका ४१, पाल्पाका ४०, गुल्मीका ३४, ललितपुरका ३३, नवलपरासी २८, झापा २५, लमजुङ १७, भक्तपुर १३, र अन्य जिल्लाका २१३ जनालाई सर्भेक्षणमा समेटिएको थियो ।
उनीहरु मध्ये कोरियामा रहंदा औद्योगीक उत्पादनमुलक क्षेत्रमा ९५.६८ प्रतिशत , कृषि तथा पशुपालन क्षेत्रमा ३.४७ प्रतिशत र अन्य क्षेत्रमा ०.८५ प्रतिशतले काम गरेर फर्केका थिए ।
