प्रथम किम्हे फुटसल कपसँगै महिला मैत्रीपूर्ण प्रतियोगिता हुने
अमिर योन्जन । प्रथम किम्हे युनाईटेड पुरुष फुटसल कप–२०२४ सँगै महिला मैत्रीपूर्ण प्रतियोगिता हुने भएको छ । किम्हे युनाईटेड फुटबल क्लबको आयोजनामा जुलाई १४ तारिख हुन लागेको हो ।
कोरियाको ख्याङ्सङ्नाम्दो प्रान्तको किम्हे–बुसन क्षेत्रको मासन, छाङ्वन सी सहरमा हुने आयोजकले बताएको छ । ‘विदेशी भूमिमा सङ्घर्षको क्रममा, रमाऊ हाम्रो फुटसलको गोलमा’ भन्ने नाराका साथ कोरियामा रहेर खेलको दौरानमा घाइते खेलाडी उद्धार सहयोगार्थ प्रतियोगिता आयोजना हुन गई रहेको आयोजकले सूचनामा उल्लेख गरेको छ । प्रतियोगिताको समूह विभाजन (टिमको टाई सिट) जुलाई ७ आइतबार भएको छ । जसमा आयोजकसहित ३२ टिमले समावेशको लागि दर्ता गरेका छन् । १६/१६ टिम गरी पोल ए र पोल बी गरी लिग सिस्टममा खेलाइने छ भने दोस्रो चरणदेखि नकआउटमा खेल खेलाइने छ । प्रत्येक खेलको १०/१० मिनेटको समयमा हुने तालिका रहेको संस्थापक संयोजक राज लामा मोक्तानले बताएको छ ।
गत हप्ता मात्रै सम्पन्न ख्याङ्गीदोको ह्वासङसीमा ‘पहिलो ह्वासङ फुटसल कप–२०२४’ प्रतियोगितामा पहिलो महिला मैत्रीपूर्ण फुटबल प्रतियोगिता सम्पन्न गरेको थियो । सोही महिला फुटबल प्रतियोगितालाई निरन्तरता दिदै जाने हेतुले किम्हे युनाईटेड फुटसल कपमा पनि महिलाे फुटबल प्रतियोगिता आयोजना गरिने नेपाल फुटबल महासङ्घका अध्यक्ष कृष्ण गुरुङ (ब्रो तमु)ले जनाकारी दिए । उनले एक सूचना मार्फत सहर्ष जानकारी गर्दै विभिन्न क्षेत्रमा छरिएर रहेका नेपाली महिला फुटबल खेलाडीहरूलाई एकबद्धता हुन अनुरोध गरेको छ । साथै फुटबलप्रेमीहरु खेल स्थलमा उपस्थितिको लागि पनि आव्हान गरेको छ ।
प्रतियोगिताको विजेताले कोरियन वन तीस लाख, सिल्ड, मेडल र प्रमाणपत्र पाउने छन् । त्यस्तै उपविजेताले कोरियन वन बिस लाख, सिल्ड, मेडल र प्रमाणपत्र पाउने छन् । उत्कृष्ट खेलाडी, सर्वाधिक गोलकर्ता र उत्कृष्ट गोल रक्षकले नगद १ लाख वन सिल्ड, मेडल र प्रमाणपत्र पाउने संस्थापक संयोजक राज लामा मोक्तानले जानकारी दिए । र मैत्रीपूर्ण महिला फुटबल खेलमा खेलाडीहरुलाई प्रमाणपत्रबाट सम्मानित गरिने आयोजकले जनाएको छ । प्रतियोगिता बिहान ८ बजेदेखि सुरु हुने छ ।
