मजदुर मैत्री एनआरएनका लागि मजदुर नै अध्यक्ष : सञ्जिव कुमार राई

उदयपुरमा जन्मिएका सञ्जिव कुमार राईका ठूला सपना थिएनन् । त्रिभुवन विश्वविद्यालयबाट जुलोजीमा मास्टर गर्दै गर्दा उनले धेरै खर्च नगरि राम्रो आम्दानी हुने कोरियाली भाषा र कोरियाका बारेमा सुने । घरैमा बसेर उनले भाषा परिक्षा दिए र पास गरे । त्यस्तैमा उनको मास्टर डिग्रीको पढाई पनि सकियो ।
औपचारिक पढाई सकिएको केही समय पछि नै उनी ईपिएस मार्फत कोरिया उडे । सन् २०१३ मा कोरिया आएका उनले पहिलो कार्यअवधि सकाए । नेपाल गए । दोस्रो पटक कोरिया आए पछि उनले विभिन्न संभावनाका ढोका चहारे । उनलाई यहाँको नियम अनुसार दक्ष कामदारको रुपमा पाईने ई सेभेन भिसा पाए ।
उनले सामाजिक कार्यहरु पनि निरन्तर गरे । किम्हे बुसान क्षेत्रमा न्यू भिजन ग्रुपको बारेमा थाहा नहुने कमै छ । विभिन्न सामाजिक कार्यसँगै मनोरञ्जनात्मक कार्यक्रम गर्ने न्यूभिजनका उनी संस्थापक अध्यक्ष हुन् । त्यति मात्रै होइन उनले गैर आवासीय नेपाली संघ (एनआरएनए)मा पनि सक्रिय सहभागिता जनाउँदै आएका छन् ।
पहिलो पटक उनी सन् २०१९ देखि २०२१ को कार्यकालमा उपाध्यक्ष पदमा उम्मेद्वारी दिए र जिते पनि । दोस्रो पटक उनी सन् २०२१ देखि २०२३ सम्मका लागि बरिष्ठ उपाध्यक्षमा सहमतिमै चुनिए । कोरियामा रहेका विभिन्न क्षेत्रीय र जातीय संघसंस्थामा पनि उनी निरन्तर लागि रहेका छन् ।
झन्डै एक दशकको कोरिया बसाईमा उनले धेरै पटक सुने कोरियामा हरेको एनआरएनए मजदुर मैत्री बनाउने । उनी आफै पनि दुई कार्यकाल गैर आवासीय नेपाली संघको कार्यकारी पदमा बसे । ईमान्दार भएर काम गर्न खोजे । कति उनका कुरा सुनियो कति सुनिएनन् । ‘उपाध्यक्ष पदमा बसेर गर्न सक्ने मैले गरेको हुँ । एनआरएनएमा भएका आर्थिक हिनामिनाका कुरा गरेँ । बाहिर जति सुनिनु पर्ने र भन्नु पर्ने त्यो चाहि मैले भनेनछु । मुख्य पदमा नपुगी आफैले चाहेको जस्तो काम नहुने रहेछ । त्यसैले यो पटक मेरो उम्मेद्वारी हो ।’
राई कोरियामा रहेको एनआरएनएमा ईपिएस मार्फत आएर अध्यक्षका उम्मेद्वार दिने पहिलो ब्यक्ति हुन् । कोरियामा झन्डै ५० हजार नेपाली छन् । ४० हजार भन्दा बढि नेपाली ईपिएस मार्फत नै कोरियामा छन् । त्यस पछि विद्यार्थी र व्यवसाय गरेर बसेका नेपाली । एनआरएन कोरियाकै सदस्यता लिएका ४ हजार ८ सय ७६ मध्ये अधिकांश ईपिएस मार्फत आएका नेपाली हुन् । ‘कोरियामा सबै भन्दा बढि ईपिएस मार्फत आएका साथीभाइ छन् । अनि हाम्रै नेतृत्व गर्ने दिन भनेकै यहि हो । म सच्चा मजदुर मैत्री एनआरएनए बनाउँछु ।’
उनले अध्यक्षमा जिते गर्ने कामका लिस्ट लामै छन् । ती सबै कति पुरा होलान् यसै भन्न गाह्रो छ । ‘हामीसँग अहिले ४० बर्ष भन्दा मुनिका टिम छौं । युवा जोस जाँगरले भरिएकोले पनि हाम्रा कुरा पुरा हुन्छन् भन्ने हामीलाई विश्वास छ ।’
पारदर्शीता नभएकोले अहिलेको कोरियाको एनआरएनएमा नेपालीको विस्वास नभएको उनको ठम्याई छ । ‘हाम्रो टिमले जित्यो भने हामी सबै बैठक लाईभ गर्छौ । क्षेत्र अनुसार दोभाषेको व्यवस्था पनि गर्छौं ।’
कुनै बेला तेक्वान्दोका खेलाडी राई म्युजिक भिडियो पनि खेल्थे । कोरियामा आए पछि भने काम र समाजिक संघ संस्थाको जिम्मेवारीले फुर्सत पाएका छैनन् । ‘खुकुरीको चोट अचानोलाई थाहा हुन्छ । म पनि मजदुर हुँ । कोरियामा भएको एनआरएन पनि मजदुर मैत्री हुनु पर्यो । त्यसैले यो पटक मलाई भोट दिनुस् ।’
चुनाब लागेको बेला भोट माग्नु सामान्य नै भयो । उनले पनि मागे । निर्णय तँपाईको ।