सम्बन्ध सुधारका लागि जापानी प्रधानमन्त्री १२ बर्ष पछि सोलमा

कोरियाली राष्ट्रपति युन सुक यल ५२ दिन अघि टोकियोमा पुगेका थिए । दुई देशबीचको तनावपूर्ण सम्बन्धलाई सुधारका लागि ठ्याक्कै १२ बर्ष पछि कोरियाली राष्ट्रपतिले जापानको भ्रमण गरेका हुन् । सन् १९१० देखि १९४५ सम्म जापानले कोरियालाई आफ्नो उपनिवेशन बनाए देखि नै कोरिया र जापानको सम्बन्ध राम्रो छैन ।
ठ्याक्कै १२ बर्ष पछि नै जापानी प्रधानमन्त्री फूमियो किशिदा दक्षिण कोरियाको दुई दिने भ्रमणमा आइतबार सोल आइपुगेका छन् । एसियाको दोस्रो र चोथौ आर्थिक हैसियत भएको देशको सम्वन्ध सुधारका लागि यो भ्रमण गरेका हुन् ।
कोरियामा जापानसँगको अहिलेका राष्ट्रपतिको कार्यशैलीलाई धेरै जनताले भन मन पराएका छैनन् । प्रतिपक्ष दल दुई महिना देखि नै राष्ट्रपतिको कार्यका विरुद्ध सडक आन्दोलनमा छ । तर आज दुबै देशका नेताले एकै स्वरमा दुबै देशको सम्बन्ध सुधार गर्नु पर्ने र उत्तर कोरियासँग कडा रुपमा प्रस्तुत हुन पर्ने बताएका छन् ।
कोरिया १९१०–४५ सम्म जापानको औपनिवेशिक शासनको अधीनमा हुँदा जापानी कम्पनीहरूले कोरियालीहरुलाई कडा श्रम गर्न बाध्य पारिएको र केही कोरियालीहरूको ज्यान गएको भन्दै आफन्तले क्षतिपूर्तिको दिन कोरियाली अदालतमा मुद्दा दायर गरेका थिए । लामो सयम देखि चलेको विवादित् मुद्दा दुई महिना अघि कोरियाली सर्बोच्च अदालतले धेरै समय अघि नै भएको घटनाको क्षतिपुर्ति अहिले माग्न नमिल्ने निर्णय गरेको थियो । यो निर्णय धेरै कोरियालीले सोचे भन्दा फरक आएको थियो ।
कोरियालीहरुले यस अघिको राष्ट्रपति मुन जे इनको कार्यकालकोे अन्त्य तिर जापानद्धारा आर्थिक नाकाबन्दी व्यहोरेका थिए । त्यसको प्रतिरक्षाका लागि कोरियालीहरुले पनि कतिपय जापानका सामानमा प्रतिवन्ध लगाएका थिए भने कोरियामा भएको जापानका कतिपय उत्पादनलाई वहिस्कार अभियान नै चलाएका थिए । मुन प्रशासनको बेला लागेको कतिपय प्रतिवन्ध राष्ट्रपति युनको भ्रमणसँगै फुकुवा भएको जनाएका थियो ।
दुबै देशका नेता सम्बन्ध सुधारका लागि प्रयासरत छन् । उनीहरु दक्षिण कोरिया र जापान मिलेर चीनसँगको सम्वन्धलाई परिवर्तन गर्न चाहन्छन् । टोकियो र सोल यही भेट मार्फत दुई देशको राष्ट्रिय सुरक्षा, उन्नत उद्योग, विज्ञान तथा प्रविधि र सांस्कृतिक आदानप्रदानका बारेमा छलफल गरेर ठोस निर्णयमा पुग्न चाहन्छन् । साथै दुई नेताको भेटले इन्डो–प्यासिफिक क्षेत्रले सामना गरिरहेका विभिन्न चुनौतिहरूलाई सम्बोधन पनि गर्न सक्ने कोरियाली सञ्चार माध्यमले जनाएका छन् ।