सुन्छन महोत्सव हेरेर फर्किदा

ग्लोवल लोकल लिडर, अर्थात् ख्यङसाङनाम्दो प्रान्तको बहुसाँस्कृतिक परिवारभित्रका प्रगतिशिल महिलाहरुको समूह । विभिन्न मुलुकको कलासंस्कृतिलाई आदानप्रदान गर्दै स्थानीय तहमा जनचेतना जगाउदै सामाजिक क्षेत्रमा हातेमालो गर्दै अघि बढ्ने लक्ष्यसहित ख्यङसाङनाम्दो बहुसाँस्कृतिक परिवार केन्द्रको मातहतमा रहेर गतवर्षदेखि सुरु भएको उक्त समूह ‘ग्लोबल लोकल लिडर २०२३’ मा भने मैंले पनि सहभागिता जनाएको छु । यहि समूहको दोस्रो कार्यक्रम
अन्तर्गत गत शनिबार झल्लानाम्दोको सुन्छन शहरमा रहेको ऐतिहासिक तथा अत्यन्तै रमणीय स्थलमा चलिरहेको ‘सुन्छनमान अन्तर्राष्ट्रिय गार्डेन एक्सपो २०२३’ को लागि हाम्रो टोली छाङवनबाट निस्कियो ।

झण्डै २ घण्टा लामो बस यात्रालाई रौनकता छर्दै आयोजक ख्यङसाङनाम्दो बहुसाँस्कृतिक परिवार केन्द्रका कर्मचारीहरुले क्वीज गेम गराएर समयलाई भुलाइरहेका थिए । त्यहि बिचमा २७ वर्षदेखि कोरियालाई कर्मथलो बनाएर ट्रेकिङ गाइडको काम गर्दै आएकी चिनियाँ दिदी सोङ युनहेले चीनबाट आएर कोरियामा गरेको संघर्षको कथा, सफलताका गाथासँगै ट्रेकिङ गाइड गरेर कमाएको पैसाले आफ्ना श्रीमानलाई उपहार स्वरुप महंगो कार किनि दिएको प्रसंगलाई पनि खोतल्न भ्याइन् । सुन्छनमा पुगेर दिनको खाना खाएर हामी महोत्सव स्थलतिर लम्कियौं ।

बाटोको दुबैतिर विभिन्न मुलुकका झण्डाहरु फरफराइरहेका थिए । “ऊ इन्डियाको झण्डा”, मैंले छेउमा बसेको साङमोलाई देखाउदै भनें ।

“हो त रछ नेपालको चाही खोइन त?”

“नेपालको झण्डा अरु देशकोसँग आकार फरक भएर होला नि”, मैंले ठट्यौली पारामा जवाफ फर्काएँ ।

हामी बसबाट ओर्लेर भित्र पस्न लामबद्ध भयौं । मान्छेको भिड ठुलै थियो । कोरोनाको मारमा करिब ३ वर्ष जति भिडभाडबाट टाढिएका हामी खुलेआम हिड्न पाउदा आफैंलाई स्वतन्त्रता पाएको महशुस भइरहेको थियो । टिकट हातमा लिएर आफुसँगै आएका साथीहरुबाट छुट्टिने पो हो कि भन्ने डरले आँखा तन्काउदै साथी पछ्याउने सुरमा मैंले मेरो फोन बसमै छाडेको पत्तै पाइन । फर्कौं बस कता खोज्ने ‘आ~होस्’ भन्दै साथी पछ्याएर भित्र पसें ।

‘आहा ! कति सुन्दर ठाँउ’ मन पुलकित भयो तर केले खिच्ने फोटो? हरियो दुबोमाथी थचक्कै बसें ।

“दिदी, मेरोबाट खिच्दा भइहाल्छ नि यी लिनुस् फोन बरु तपाई नै खिच्नुस्”, साङमोले आफ्नो फोन मलाई नै थमाइदिइन् ।

सामुहिक तस्विर लिएपछि हामी रंगीचंगी फुलेका फूलहरुसँग रमाउन थाल्यौं । केहीबेरपछि छरपस्टिएको हाम्रो टोली जम्मा भयौं । हामीलाई गाइड गर्ने महिला आइन् । हामी उनको पछि लाग्यौं । उनले पार्कको ऐतिहासिक महत्व, साँस्कृतिक पक्ष, भौगोलिक अवस्था जस्ता सुन्छन सहरलाई प्रतिनिधित्व गर्दै बनाइएको पार्कको बारेमा जानकारी दिदै अघि बढिन्। पार्कमा सुन्छनको भौगोलिक, सांस्कृतिक र ऐतिहासिक पक्ष मात्र होइन अमेरिका, बेलायत, फ्रान्स, डेनमार्क, मेक्सिगो, इन्डोनेशिया, थाइल्याण्ड, जापान, चीनलगायतका कला संस्कृति र परिवेशलाई चित्रण गरेर बनाइएको पार्कमा पुग्दा विश्वयात्रा गरेको महशुस हुन्छ । सुन्दर बगैंचा, झर्ना, जंगल र वस्तीहरु हेर्दै समथर भूभाग र पहाडको पैदलयात्रा मात्र होइन पानी जहाज र स्काइक्युवको आनन्द पनि त्यत्तिकै लिन सकिन्छ ।

“मलाई त एक हप्ताभरी यही बसौं जस्तो लाग्यो”, ख्यङसाङनाम्दो बहुसाँस्कृतिक परिवार केन्द्रका केन्द्र प्रमुख सङ हेक्यङ भन्दै थिइन् । सुन्छनमान अन्तर्राष्ट्रिय गार्डेन एक्स्पो २०२३ गत अप्रिल १ तारिखबाट सुरु भएर अक्टोबर ३१ तारिखसम्म चल्ने भएको छ ।