सफ्टवेयर व्यापारबाट अर्बपति
काठमाडौं- कडा परिश्रम, सार्थक संघर्ष र लगनशीलता त्यसै खेर जाँदैन । एक न एक दिन मानिस सफलताको टाकुरोमा पुग्न सफल हुन्छन् । त्यस्तै सफलता हासिल गर्ने व्यक्तिहरूमध्येका एक हुन्, संयुक्त राज्य अमेरिकाका अलेक्सज्यान्डर कार्प । आफैंले खोलेको सफ्टवेयर कम्पनीले उनलाई सफलताको शिखरमा पुर्याएको हो । कम्पनी खोलेको १० वर्षमै उनी विश्वकै धनाढ्य दरिएका छन् । सुरुका दिनहरूमा उनको कम्पनी केही क्षेत्रमा मात्रै सीमित थियो, पछि सरकारी निकाय हुँदै निजी संस्थाहरूसम्म विस्तार हुन पुग्यो । तर उनले दिएको सेवाबाट मनग्ये धन आर्जन हुन सकेन । आफ्ना अतितलाई सम्झिँदै एकताकाका उनले भनेका थिए, ‘कम्पनी खोलेको सुरुका वर्षहरू मेरा लागि सन्तोषजनक थिएनन् । तर विचलित भइनँ, कम्पनीलाई सफलताको चुचुरोमा पुर्याउन अहोरात्र खटिरहें ।’ त्यही कारणले नै हाल उनको कम्पनी ‘प्लान्टिर टेक्नोलजिज’ अमेरिकी खुफिया संस्थाका लागि नभई नहुने स्थितिमा पुगेको छ । गोप्य तथ्य/तथ्यांकहरू विश्लेषणका लागि उनको ‘प्लान्टिर टेक्नोलजिज’ अमेरिकाकै एक लोकप्रिय निजी सफ्टवेयर कम्पनी पुग्यो । सन् २००४ मा खोलिएको यो कम्पनीका मुख्य उपभोक्ता सुरुको वर्षहरूमा संयुक्त राज्य अमेरिकाको इन्टेलिजेन्स कम्युनिटीका संघीय नियोगहरू थिए । कम्पनीको विस्तारपछि यसको सेवा ‘स्टेट’ र स्थानीय सरकारका लागि सुरु गरियो, पछि निजी कम्पनीहरूले पनि ‘प्लान्टिर टेक्नोलजिज’ का उत्पादनहरू उपयोग गर्न थाले ।
खासगरी ‘फाइनान्सियल’ र ‘हेल्थकेयर’ उद्योगहरूमा कम्पनीको सफ्टवेयरको व्यापक प्रयोग हुन थाल्यो । त्यसपछि कार्प कम्पनीका दुई सफ्टवेयर परियोजना एकैसाथ सञ्चालनमा ल्याए । तीमध्ये एउटा ‘प्लान्टिर गोथाम’ र अर्को ‘प्लान्टिर मेट्रोपलिस’ । ‘प्लान्टिर गोथाम’ नामको सफ्टवेयर संयुक्त राज्य अमेरिकास्थित इन्टेलिजेन्स कम्युनिटी र रक्षा मन्त्रालयले ‘काउन्टर–टेरोरिज्म’ अर्थात आतंकवादविरुद्ध अभियानमा प्रयोग गरे ।
खासगरी ‘रिकभरी एकान्टाब्लिटी’ र ‘ट्रान्सपेरेन्सी’ बोर्डका ‘फ्रड’ अनुसन्धानकर्मीका लागि त्यो सार्थक सिद्ध हुन पुग्यो । ‘इन्फर्मेसन बारफेयर मनिटर (घोस्टनेट र स्याडो नेटवर्क अनुसन्धान) अन्तर्गत साइबर विश्लेषण गर्नमा पनि यो सफ्टवेयर प्रयोगमा ल्याइयो । त्यस्तै ‘प्लान्टिर मेट्रोपोलिस’ चाहिँ बैंक, आर्थिक सेवा दिने संस्थाहरूमा प्रयोग भइरहेका छन् । फोब्र्सको अर्बपति सूचीमा पर्नुभन्दा एक वर्षअघि कम्पनीको ‘सीईओ’ अलेक्स कार्पले कम्पनी चलाउन नसक्ने स्थिति आएको बताएका थिए ।
फोब्र्स पत्रिकाका अनुसार सन् २०१४ को सुरुमा कम्पनीको सम्पत्तिको मूल्यांकन ९ अर्ब अमेरिकी डलर भई ‘प्लान्टिर’ सिलिकन भ्याली जस्तो कम्पनीमा दरियो । त्यसपछि उनी उत्साहित हुँदै त्यही वर्षको डिसेम्बरमा केन्नेथ ल्यान्गोन र स्टान्ली ड्रकेनमिलर, सीआईएको इन–क्यु–टेल, टाइगर ग्लोबर म्यानेजमेन्ट र फाउन्टर्स फन्डजस्ता नीति लगानीकर्ताहरूको खोजीमा जुटे । त्यसैक्रममा पिटर थिएल प्लान्टिरका सबैभन्दा ठूला सेयरकर्ता बन्न पुगे । यसले कार्पको भाग्य नै चम्काइदियो, कम्पनी निकै माथि उक्लियो । सन् २०१५ को जनवरीमा कम्पनीको सम्पत्ति १५ अर्ब अमेरिकी डलर पुग्यो ।
फोब्र्सका अनुसार अलेक्सज्यान्डर कार्प यो वर्षको अर्बपतिमा १५३३ औं स्थानमा परेका छन् । सन् २०१५ जुलाई १७ सम्ममा उनको कुल सम्पत्ति १ दशमलव २ अर्ब अमेरिकी डलर छ । अमेरिकाको क्यालिफोर्निया राज्यस्थित पालो अल्टोमा बसोबास गर्ने ४७ वर्षीय सफ्टवेयर उद्यमी कार्प यो वर्ष अमेरिकी धनाढ्यहरूको सूचीमा भने ४८७ औं स्थानमा छन् । स्टान्फर्ड विश्वविद्यालयबाट डाक्टर अफ ज्युरिसप्रुडेन्स र हार्वरफोर्ड कलजेबाट कला/विज्ञानमा स्नातक गरेका उनी हाल प्यान्टिर टेक्नोलजिज संस्थापक र सीईओ हुन् । उनको कम्पनीको हालको कुल सम्पत्ति १५ अर्ब अमेरिकी डलर रहेको बढी रहेको अनुमान गरिएको छ । कम्पनीले गुप्तचर सेवालाई थप चुस्त र दुरुस्त बनाउन अमेरिकी गुप्तचर संस्था ‘सीआईए’ लाई सफ्टवेयरमा सहयोग गरेको छ । सुरुका दिनमा कम्पनी आर्थिक संकटमा परेको बेला गुप्तचर संस्थाले पनि आर्थिक स्रोत जुटाइदिएको बताइएको छ । पछि कार्पले स्कुले साथी पिटर थिएलको सहयोगबाट आफ्नो कम्पनीलाई चम्काए ।
अर्बपति पिटर अमेरिकी कम्पनीहरूमा संयुक्त लगानी गर्नेमध्येका एक हुन् । कार्पले एक अन्तर्वार्तामा भनेका थिए, ‘हामीले नागरिक स्वतन्त्रतालाई बेवास्ता गर्ने हो भने आतंकवाद विरुद्धको लडाइँ लड्न र जित्न सक्तैनौं । त्यसैले नागरिक स्वतन्त्रताबिना आतंकवादमाथि लडिने कुनै पनि युद्धको मतलव हुँदैन ।’ कार्पको यो भनाइ अमेरिकाले जारी राखेको आतंकवाद विरुद्धको लडाइँसँग जोडेर हेर्ने गरिएको छ । किनभने उनको कम्पनीले बनाएको सफटेयर प्रयोग गरी अमेरिकी गुप्तचर संस्थाले निकै फडको मारेको छ । कार्प भने सफ्टवेर बेचेर अर्बपति बनेका छ
