दुई शव नेपाल पठाउन करोड लाग्ने भएपछि सहयोगको अपिल
नोमराज गुरुङ्
सोल – जुलाई ५ तारिख आईतबार साँझ कोरियाको ग्याङ्साङ् प्रदेशको होवाङ्सानमा मोटारसाईकल दुर्घटनामा मृत्यु भएका भिमसेन केसी र रामबहादुर सिँजालीको शव नेपाल पठाईने भएको छ । दुबैतर्फको परिवारका सदस्यहरुले शव घरमा नै लाने ईच्छा व्यक्त गरेपछि कोरियाबाट अगामी सोमबार भित्र शव नेपाल पठाउन लागिएको किम्हे माईग्रेन्ट हाउसका संयोजक यज्ञराज सुवेदीले जानकारी दिए ।
उनका अनुसार २ वटा शव नेपाल पठाउन करिब १ करोड वन (झण्डै नेपाली १० लाख) खर्च हुन्छ । २ शव नेपाल पठाउन ठूलो रकम खर्च लाग्ने भएपछि किमे माईग्रेन्ट हाउस, एन.सि.सि. बुसान, एन.आर.एन. ख्याङ्साङनाम्दो, एन.आर.एन बुसान, मगर समाज किम्हेमा, स्थापना भएका विभिन्न नेपाली संघ–संस्थाहरुले सहयोगको अपिल गरेका छन् ।
उल्लखित संस्थाहरुले सामुहिक रुपमा अनलाईन मिडियाहरु र सामाजिक सञ्जालहरु मार्फत सहयोगको लागि अपिल गरेका हुन् । उनीहरुले किम्हे माईग्रेन्ट हाउसको नाममा एन.एच (नोङ्ह्याप) बैंकमा रहेको खाता नम्बर ३०१०१३६४१३८४१ सहयोगी हातहरुको सुविधाको लागि उपलब्ध गराएको छ ।
मृत्यु हुने मध्य रामबहादुर सिँजाली मगर एन.सीसी बुसानमा २००६ सालदेखि सदस्य, कोषाध्यक्ष, उपाध्यक्ष र सल्लाहकार भएर काम गरेका व्यक्ति हुन् । उनी नेपाल मगर संघ किम्हे लगायत अन्य नेपाली संंघ–संस्थाहरुमा समेत आबद्ध रहेको बताईएको छ ।
नेपाली राजदुताबास कोरियाका उपनियोग प्रमुख राजाराम बर्तौलाले दुबै मृतकको नेपालमा रहेको परिवारबाट वारिसनामा मगाउने काम भईरहेको जानकारी गराए । उनका अनुसार अगामी आर्थिक चाँजोपाँजो मिले अगामी सोमबारसम्म दुवैको शव नेपाल पठाईनेछ ।
यता स्याङ्जा परिवार दक्षिण कोरियाले मंगलबार एक विज्ञप्ती जारी गरी दुर्घटनामा परि मृत्यु हुने द्धय भिमसेन केसी र रामबहादुर सिँजाली प्रति समवेदन प्रकट गरेको छ ।
परिवारले मृतकका शोकाकुल परिवार प्रति धैर्य धारण गर्ने शक्ति मिलोस भन्दै शव नेपाल पठाउने प्रक्रियामा अर्थ शंकलन समेत सुरु गर्ने जनाएको छ ।
एकै कम्पनीमा कार्यरत मृतक उनीहरु मध्य भिमसेन केसी स्याङ्जा बिरुवा अर्चले–६, र रामबहादुर सिँजाली हाल नवलपरासी सुनौल हर्दिया स्थाई बसोबास भए पनि पुख्र्यौली घर स्याङ्जा तीन दोबाटे भएको विज्ञप्तीमा उल्लेख छ ।
मृतक द्धय नै परिवार भित्रकै सदस्य भएकाले सम्पूर्र्ण स्याङ्जाली र कोरियामा रहेका नेपाली दाजुभाईहरुमा स्याङ्जा परिवार दक्षिण कोरियाले सहयोगको अपिल समेत गरेको छ ।
सहयोगी हातहरुको सुविधाको लागि परिवारको कोषाध्यक्ष टेक रानाको नाममा उरी बैंकमा रहेको खाता नम्वर १००२८४७४४३३९४ नगद जम्मा गर्न सकिने छ । साथै तपाईले नगद डिपोजिट गर्नुभएपछि टेक रानाको यो नम्वरमा म्यासेज गर्नुहुन अनुरोध गरिएको छ । टेक राना मोबाईल नम्वर ०१०२६७२१७३१
