कोरियाको गजेदो शहरमा चलचित्र “छ माया छपक्कै” प्रदर्शन हुने, तयारी पुरा
दक्षिण कोरियाको गजेदो शहरमा चलचित्र “छ माया छपक्कै” प्रदर्शन गर्ने भएको छ । आपतकालीन राहतकोष स्थापनार्थ डेउ तमु समाज गजेदो दक्षिण कोरियाले उक्त चलचित्र प्रदर्शन गर्न लागिएको हो ।
साथै यसको सम्पुर्ण तयारी समेत पूरा भैसकेको जानकारी समाजका निवर्तमान अध्यक्ष गोपाल गुरुङले जानकारी दिएका छन् । “हामीले यस गजेदो क्षेत्रमा रहेका नेपालीहरुलाई भैपरी आउन सक्ने आपतकालीन समस्याहरुमा सहयोग पुग्न सकियोस् भनेर आपतकालीन राहत कोष स्थापना गर्न लागेका छौं । त्यसैले यहाँ रहेका सम्पुर्ण नेपाली दाजुभाइ तथा दिदीबहिनीहरुलाई उपस्थितिका लागी हार्दिक अनुरोध गर्न चाहन्छु ।” गुरुङले बताए । मनोरञ्जनको साथ साथै सामाजिक कार्यमा पनि सहयोग पुग्ने भएकालेे यसमा सबैले साथ र सहयोग गर्नेमा ढुक्क रहेको भनाइ गुरुङको रहेको छ ।
चलचित्र प्रदर्शन यही आउदो नोवेम्बर २३ तारिख शनिबारका दिन बेलुकी ७ बजे गजेदोको गजे थेहाक्यो हलमा हुने जनाएको छ । यस अघि कोरियाकै दुई शहर सउल र ख्यङसान/बुसानमा पनि चलचित्र सफलता पुर्वक प्रदर्शन भैसकेको छ ।
दिप्रेन्द्र लामाको कथा र निर्देशनमा तथा रोहित अधिकारीको निर्माणमा बनेको यस चलचित्रमा दिपकराज गिरी, केकी अधिकारी, केदार प्रसाद घिमिरे (माग्ने बुढा), जितु नेपाल (मुन्द्रे), स्वपुष्प भट्टा, बुध्दि तामाङ (हैट), प्रकाश घिमिरे, रमा थपालिया, शिशिर भडेल, अनुराघ कुवाँर, बिष्णु सापकोटा, सबिन बास्तोला, बसन्त भट्टा, शारदा गिरी, दिपक क्षेत्री, सुनिता गौतम, राजनी गुरूङ, कुमार गजुरेल, सन्देश लामिछाने, देव जोशी, प्रदिप न्यौपाने र भिम श्रेष्ठ लगायतका कलाकारहरूको अभिनय देख्न सकिन्छ ।
